Burime bëjnë me dije se automjeti i përdorur në krim, i cili u gjet duke u djegur nga Policia në një distancë jo shumë të largët nga vendi ku ndodhi atentati, rezulton se kishte të prerë numrin e shasisë.
Gjithsesi, mësohet se me ndihmën e ekspertëve gjermanë, është bërë i mundur që të identifikohet dhe më pas është shkuar tek autorët, ku kanë rezultuar dy kosovarë.
Këta të fundit i kanë paraqitur grupit hetimor prova se automjetin afro një vit më parë ja kishin shitur Erald Cenajt.
Hetuesit besojnë se Erald Cenaj ka dijeni të plotë për personat që kanë organizuar vrasjen e Kristian Markut nga Rrësheni, por deri më tani, ai ka “kycur” gojën para grupit hetimor.
Dyshohet se ekzekutimi është realizuar duke përdorur dy automjete. Njëri prej mjeteve ka shërbyer për realizimin e atentatit, ndërsa tjetri për largimin e autorëve, pas djegies së automjetit të parë. Nga dinamika e ngjarjes, dyshohet se atentati është realizuar nga vrasës profesionistë që kanë menduar çdo gjë me detaje, përfshirë dhe rrugën e arratisjes.
Grupi hetimor dyshon se ndjekja e makinës së Kristian Markut ka nisur që në afërsi të rrethrrotullimit të Levanit, për ta ekzekutuar më pas pranë nënkalimit të Novoselës. Viktima ka qenë duke udhëtuar në drejtim të Vlorës me një automjet tip “Volkswagen Passat”, në momentin kur autorët i kanë dalë paralel me një automjet tip “Golf” dhe e qëlluan për vdekje.
Dyshohet se Kristian Marku ishte ndjekur për disa ditë me radhë përpara se të ndodhte ngjarja. Ai kishte marrë një automjet me qira në Tiranë, ç’ka sugjeron se lëvizjet e tij ishin nën vëzhgim të vazhdueshëm nga autorët.
Deri më tani, pistë kryesore mbetet ajo e hakmarrjes me fisin Reçi në Mirditë, përplasje e nisur që me ngjarjen e 26 Marsit të vitit 2023, ku u qëllua me armë zjarri drejt Saimir Reçit, nipit të Kastriot Reçit, i vrarë në Janar 2020 me snajper në qendër të Rrëshenit. Ndërkohë, në shtator të vitit 2023, Kristian Markut i vranë edhe xhaxhain, Martin Bardhi.
