Policia e Tiranës ka arrestuar në flagrancë tre persona (mes tyre edhe pronarin e një dyqani) të cilët u kapën duke transportuar veshje dhe aksesorë të kontrabanduar me vlerë rreth 50,000 euro.
Të arrestuarit janë Adriatik Koleci, Kastriot Koçi, dhe Sandri Kalemi, të tre banues në Tiranë. Ata u kapën në rrugën “Teodor Keko” duke transportuar me dy automjete 16 çanta dhe valixhe të mbushura me veshje dhe aksesorë pa fatura blerjeje.
“Si rezultat i administrimit të shpejtë të informacioneve të siguruara nga inteligjenca policore, për një rast të tregtimit të veshjeve dhe aksesorëve të kontrabanduar, Seksioni për Hetimin e Krimeve Ekonomiko-Financiare i DVP Tiranë finalizoi operacionin “Furnizimi”.
Gjatë operacionit u arrestuan në flagrancë shtetasit A. K., 33 vjeç, K. K., 64 vjeç dhe S. K., 34 vjeç, të tre banues në Tiranë.
Në rrugën “Teodor Keko”, janë ndaluar automjetet me drejtues shtetasit A. K. dhe K. K., si dhe pasagjer shtetasin S. K., në të cilat nga kontrollet janë gjetur 16 çanta dhe valixhe, me veshje dhe aksesorë, pa fatura blerjeje. Nga veprimet hetimore dyshohet se mallrat e kontrabanduara do të shiteshin në dyqanin e 33-vjeçarit“, thuhet në njoftimin e policisë.
