Të tjera detaje dalin në dritë lidhur nga hetimet e prokurorisë për Kristian Konin, pasuria e të cilit është sekuestruar pasi dyshohet se rrjedh nga aktiviteti kriminal i trafikut të drogës dhe lidhjet e tij me organizatën mafioze Camorra.
Në dosjet thuhet se “Nga verifikimet e kryera, është evidentuar se shtetasi Kristian Koni ka kryer një numër të konsiderueshëm transaksionesh për shitblerje pasurish të luajtshme gjatë periudhës 2013-2024”.
Është konstatuar se edhe nëna e tij, shtetasja Fitnete Meta ndonëse figuron si pensioniste, ka qenë e përfshirë në disa transaksione pasurore në vlera relativisht të larta. Konkretisht: Më datë 13.09.2014, Fitnete Meta i ka shitur palës blerëse Elton Doma pasurinë: “Apartament me sipërfaqe 124.6 m², ndodhur në Farkë, Tiranë”, kundrejt çmimit 50,000 euro. Mënyra e pagesës e deklaruar në kontratë: Shuma konsiderohet e likuiduar si detyrim që Fitnete Meta kishte ndaj Elton Domës që nga viti 2012. Më datë 04.11.2014, Fitnete Meta ka blerë nga pala shitëse “Ndërtim Vila Co” sh.p.k, apartament me sip. 79.51 m², në Rrugën e Barrikadave, Tiranë”, për çmimin 54,000 euro.
Në kontratën noteriale nr. 996/169, datë 07.11.2006, është deklaruar se shuma është likuiduar jashtë zyrës noteriale, në tërësi, nga pala blerëse. Më datë 22.10.2018, Fitnete Meta ka shitur palës blerëse Roland Sh., apartament me sip. 79.51 m² dhe një garazh me sip. 12.5 m²”, kundrejt çmimit total prej 10,823,831 lekësh. Pagesa është realizuar nëpërmjet llogarisë bankare të noterit, sipas deklarimit në aktin përkatës. Më datë 23.12.2019, Fitnete Meta ka porositur një apartament dhe një vend parkimi pranë sipërmarrësit Flamur Hoxhakundrejt çmimit 199,000 euro. Mënyra e pagesës është deklaruar se do të kryhej me këste, në llogarinë bankare të sipërmarrësit, me të ardhura të gjeneruara nga shitja e një apartamenti dhe garazhi në Tiranë.
Po ashtu sikurse VNA ka raportuar Kristian Koni kishte mosmarrëveshje edhe me biznesmenin Vesel Demiraj për blerjen e një vile. Fëmijët e Demirajt i mbijetuan një atentati në Lundër dhe nuk dihet nëse konflikti me Konin, është pistë e hetimit. Lidhur me Kristian Konin alias Ols Meta, prokuroria ka zbuluar se ai ka kryer transaksione të shumta, në një kohë që kompania e tij Kriol.AL nuk kishte asnjë të punësuar, por vetëm atë si përfaqësues, ndërsa nëna e tij ishte pensioniste dhe të ardhurat nuk justifikonin blerjen e pasurive në miliona euro. Asetet janë tashmë nën sekuestro, ndërsa Kristian Koni që ka dhe disa identitete të tjera është nën hetim për pastrim parash.
