Pemëtoret dhe ullishtet pa prodhim, rrugë e hapur për ndërtim me miratim të KKUT
Parcelat e tokës të regjistruara si pemëtore ose ullishte, por që nuk kanë pemë apo prodhim, mund të shfrytëzohen për ndërtim, nëse projektet miratohen nga Këshilli Kombëtar i Territorit dhe Ujit (KKUT). Një vendim i marrë në mbledhjen e datës 25 gusht përcakton procedurat e nevojshme që duhet të ndiqen për këtë transformim.
Vendimi i titulluar “Për përcaktimin e procedurave të evidentimit në terren të pasurve zë kadastral ‘pemëtore’ apo ‘ullishte’ gjatë shqyrtimit të aplikimit për lejë zhvillimi/ndërtimi në kompetencë të KKUT-së” kërkon verifikim të detajuar të gjendjes faktike në terren.
Subjekti që aplikon për leje duhet të depozitojë pranë Agjencisë së Zhvillimit të Territorit, Ministrisë së Bujqësisë dhe njësisë vendore një procesverbal të gjendjes së parcelës, të shoqëruar me foto. Dokumenti hartohet nga një topograf dhe një agronom, të cilët vërtetojnë ekzistencën ose mungesën e kulturave drufrutore apo ullinjve.
Procesverbali duhet të nënshkruhet edhe nga pronari i tokës ose përfaqësuesi i zhvilluesit, ndërsa shoqërohet me një deklaratë noteriale ku palët marrin përsipër përgjegjësinë civile dhe penale për vërtetësinë e dokumenteve.
Më pas, kryhet konfirmimi i gjendjes faktike. Për sipërfaqet deri në 0.1 hektar, këtë e bën agronomi pranë njësisë vendore brenda 5 ditësh, ose nëse kjo nuk ndodh, agronomi pranë Agjencisë Rajonale të Ekstensionit Bujqësor. Për sipërfaqet mbi 0.1 hektar, verifikimi bëhet nga të dyja strukturat së bashku.
Vendimi parashikon të njëjtat rregulla si për parcelat e regjistruara si pemëtore, edhe për ato të regjistruara si ullishte. Për sipërfaqet më të mëdha se 0.1 hektar, në verifikim përfshihet edhe specialisti i Ministrisë së Bujqësisë.
Vetëm pas këtij procesi, Sekretariati Teknik i KKUT mund të vijojë me procedurat për lëshimin e lejes së zhvillimit apo ndërtimit. Një kopje e konfirmimit depozitohet gjithashtu pranë Agjencisë Shtetërore të Kadastrës.
Ky vendim pritet të ndikojë drejtpërdrejt në mënyrën se si shfrytëzohen parcelat e tokës në vend, duke hapur rrugën për zhvillime të reja urbane, por gjithashtu duke vendosur detyrime të qarta për transparencë dhe verifikim të hollësishëm të gjendjes së terrenit.
