Lushnja është tronditur mëngjesin e sotëm nga një atentat me armë zjarri, ku shënjestër dyshohet se ka qenë Julian Sula, i njohur në zonë si “Juli i Pashakos”, person me precedent penal dhe me rrezikshmëri të lartë.
Sipas njoftimit zyrtar të Policisë, rreth orës 10:40, në afërsi të stadiumit të qytetit është qëlluar me armë zjarri drejt mjetit të 45-vjeçarit Sula, i cili ka mbetur i plagosur në këmbë dhe ndodhet jashtë rrezikut për jetën.
Autorët dyshohet se kanë qenë tre persona, ndërsa janë larguar me shpejtësi. Pak minuta pas sulmit, në fshatin Lifajështë gjetur një automjet pa targa duke u djegur, i cili dyshohet se është përdorur nga atentatorët.
Policia ka ngritur pika kontrolli në hyrje dhe dalje të qytetit, ndërsa grupi hetimor po punon nën drejtimin e Prokurorisë për të zbardhur motivin dhe identifikimin e autorëve. Në vendngjarje janë sekuestruar gëzhoja të armës së zjarrit.
Kush është “Juli i Pashakos”?
Emri i Julian Sulës ka dalë disa herë në kronikat e zeza të viteve të fundit.
• Tetori 2017 – U mor në pyetje si i dyshuar për atentatin e rëndë në Lushnje, ku mbetën të vrarë Jurgen Hoxha dhe Zamir Latifi. Sula u vetëdorëzua, duke deklaruar se nuk kishte lidhje me ngjarjen.
• Qershor 2016 – U plagos rëndë me thika nga Arian dhe Xhino Alico. Në incident dyshohet se kanë qenë të pranishëm dhe nipi i Aldo Bares, Xhuljo Shkurti, si edhe Sajmo Xheliu.
Ngjarja e sotme rikthen tensionin në qytet, ndërsa hetimet po vijojnë për të zbardhur pistat e mundshme, përfshirë konfliktet e së kaluarës të 45-vjeçarit.
