Ish-deputeti i Partisë Demokratike, Ervin Salianji, do të nisë të mërkurën dëgjesat me qytetarët.
Mësohet se takimi i parë i Salianjit do të jetë në qytetin e Durrësit.
Këto takime vijnë pas takimit që zhvilluan në një kafene Salianji dhe eksponentë të tjerë në PD, disa prej të cilëve ishin edhe më të votuarit në zgjedhje, mes tyre edhe Ilir Alimehmeti.
Sali Berisha shfrytëzoi bashkëbisedimin me qytetarët për të minimizuar efektin e kafes që doli jashtë selisë blu. “Kandidatët e primareve në tërësi i kam takuar ose i kam telefonuar. Vetë Salianji ka qenë disa herë në këtë zyrë, Ilir Alimehmeti edhe më shpesh. Askush nuk është i përjashtuar. Problemi ka qenë angazhimi ynë total në mbrojtjen e votës”.
Por reagimet nga baza treguan se ujërat nuk janë aspak të qeta. Një video e bërë virale në rrjet tregoi aktivisten Anila Aliaj në debat me drejtues të PD-së, duke denoncuar mospërfilljen e degëve lokale. Masa e parë e marrë ishte heqja e saj nga grupi i komunikimit të partisë.
“Ajo zonja që foli me Flamur Nokën, nuk është larguar nga partia dhe askush nuk mund të largojë askënd pse shpreh mendimin. Në dijeninë time, ajo nuk është përjashtuar. S’ka asnjë vendim për përjashtimin e saj dhe nuk mund të ketë”, tha Berisha.
Kujtojmë se Salianji ka vetëm disa muaj që është liruar nga burgu i Fierit, ku vuante dënimin prej 1 viti për shpifje ndaj zyrtarëve socialistë. Vetë Salianji e ka cilësuar si sulm politik dënimin e tij me 1 vit burg.
