Omer Fruit SHPK, Nedrete Arapi PF, Besim Thaqi PF, Morina Grup SHPK, Fruit-To-Zela SHPK dhe Roland-2012 SHPK, janë gjashtë kompanitë e grumbullimit dhe tregtimit me shumicë të fruta-perimeve, të cilat janë goditur nga Autoriteti i Konkurrencës.
Pas një hetimi të thelluar 2 vjeçar, ka rezultuar se këto kompani dhe sipërmarrësit që qëndronin pas tyre, kanë vepruar si kartel, duke bërë marrëveshje për të diktuar çmimet e kontrolluar tregun, që në fakt është e ndaluar me ligj.
Autoriteti i Konkurrencës sqaron se 6 kompanitë e goditura kontrollonin tregjet me me shumicë të fruta–perimeve në qarqet Tiranë, Elbasan, Berat, Fier dheKorçë.
Omer Fruit SHPK, Nedrete Arapi PF, Besim Thaqi PF, Morina Grup SHPK, Fruit-To-Zela SHPK dhe Roland-2012 SHPK rezulton se kanë bashkërenduar çmimet e blerjes gjatë periudhave të sezonit, duke diktuar çmimet në dëm të fermerëve dhe duke aplikuar mark-up (shtesë mbi kosto) shumë të lartë, deri në 115%.
Kjo sjellje e bashkërenduar përbën marrëveshje të ndaluar sipas nenit 4 të ligjit nr.9121/2003 dhe është cilësuar si shkelje e rëndë, për të cilën Komisioni ka vendosur gjoba deri në 0.15% të xhiros së vitit financiar paraardhës.
Newsbomb.al ka verifikuar të dhënat në Qendrën Kombëtare të Biznesit dhe rezulton se biznesmenët që qëndrojnë pas këtyre kompanive, janë:
1- Faton Morina – Pronar i “OMER – FRUIT“, në Lushnjë;
2- Nedrete Arapi – Pronare e “Nedrete Arapi Person Fizik“, në Lushnjë;
3- Besim Thaqi – Pronar i “Besim Thaqi Person Fizik“, në Fier;
4- Bekim Morina – Pronar i “MORINA AGRICULTURE GROUP“, në Fier;
5- Nuri Zela – Pronar i “FRUIT – TO – ZELA“, në Fier;
6- Roland Vrapi – Pronar i “Roland-2012 SHPK“, në Berat.
Këta grumbullues, siç ka dalë nga hetimi i thelluar, falë fuqisë së tyre negociuese kishin krijuar një situatë ku fermerët shpesh përballeshin me çmime të diktuara e të koordinuara, dyer të mbyllura për negocim, varësi të tepruar nga pak blerës, presione për uljen e çmimeve dhe shlyerje të vonuara të pagesave, shkruan newsbomb.
Pra, thënë më thjeshtë: 6 grumbulluesit përcaktonin në mënyrë të paligjshme çmimet e grumbullimit të fruta-perimeve dhe u bënin presion fermerëve për të ulur çmimin e blerjes.
Në kushtet kur “e kishin bërë me fjalë” se sa duhej mbajtur çmimi, fermerët nuk kishin ku të shkonin tjetër për të shitur produktet, sepse të gjashtë grumbulluesit mbanin të njëjtin çmim, gati përtokë, dhe ata ishin të detyruar ose ta shisnin mallin gati pa fitimi ose të humbisnin gjithçka.
