Një ngjarje e rëndë ka tronditur një familje në Lushnje, ku një grua dyshohet se është vrarë dhe bashkëshorti i saj ka mbetur i plagosur rëndë pas një sulmi brenda banesës.
Sipas policisë, djali i çiftit, Florian Dalladaku, dyshohet se ka sulmuar me sëpatë prindërit e tij, Fanije dhe Hasan Dalladaku. Si pasojë e plagëve të marra, Fanije Dalladaku ka humbur jetën, ndërsa Hasan Dalladaku ka mbetur i plagosur rëndë.
I dyshuari është shoqëruar nga policia, ndërsa grupi hetimor po punon për zbardhjen e plotë të rrethanave të ngjarjes dhe motivit që çoi në sulmin e rëndë.
Sipas të dhënave paraprake, Florian Dalladaku dyshohet se ka pasur probleme të shëndetit mendor. Autoritetet pritet të japin më shumë detaje në vijim lidhur me dinamikën e ngjarjes dhe gjendjen e të plagosurit.
Lushnjë/Informacion paraprak
Rreth orës 21:20, në fshatin Zhymë, Lushnjë, shtetasi F. D., 45 vjeç, dyshohet se, në banesë, për motive ende të paqarta, ka goditur me një send metalik prerës (sqepar) nënën e tij, shtetasen F. D., 80 vjeçe, e cila, si pasojë e plagëve të marra, ka humbur jetën, si dhe ka plagosur rëndë babain e tij, shtetasin H. D., 77 vjeç, i cili ndodhet në spital, nën kujdesin e mjekëve.
Shtetasi F. D., i cili dyshohet se vuan nga probleme të shëndetit mendor, është larguar nga banesa pas ngjarjes. Shërbimet e Policisë po vijojnë kontrollet për lokalizimin dhe kapjen e tij.
Grupi hetimor ndodhet në vendngjarje dhe, nën drejtimin e Prokurorisë, po punon për dokumentimin e plotë të rrethanave të ngjarjes.
