Kryetari i Bashkisë së Malësisë së Madhe, katoliku Tonin Marinaj, ka urdhëruar bërjen e një tenderi për shtrim iftari.
Një përdorim i fesë në politikë, më saktë në fushatën për zgjedhjet e 11 majit.
Skema e përdorur rëndom në gjithë Shqipërinë duket se ka gjetur zbatim në Malësinë e Madhe, shumica e banorëve të së cilës janë të fesë katolike.
Marinaj synon që të marrë vota edhe nga myslimanët, duke u munduar që të shtrojë iftare. Por, jo me paratë e bashkisë! Përse nuk i shtron iftarët Marinaj me paratë e veta?
Ai është një biznesmen dhe ka pasur në pronësi lokale dhe restorante. Duke e ditur mjaft mirë rëndësinë e drekave-darkave, Marinaj do që t’u mbushë mendjen njerëzve për zgjedhje dhe votime.
Faksimile: Tenderi i hapur nga Bashkia e Malësisë së Madhe për shtrimin e iftarit
Ditët e fundit Bashkia e Malësisë së Madhe hapi procedurën e prokurimit me vlerë të vogël, me objekt “Shërbim katering për një darkë iftari”. Tenderi do të bëhet në datë 19 mars në orën 13.30.
“Jeni të lutur të paraqisni ofertën tuaj për këtë objekt prokurimi me këto të dhëna. Shërbim katering për një darkë iftari për 136 persona” thuhet në dokumente.
Bashkia e Malësisë së Madhe e ka me ngut këtë procedurë, pasi thotë se nëse nuk paraqitet i pari, do të ftohë të dytin.
“Operatori ekonomik i renditur i pari, duhet të paraqitet pranë autoritetit kontraktor brenda ditës së nesërme të punës, nga marrja e njoftimit të klasifikimit, përndryshe fitues do të shpallet ofertuesi vijues në klasifikimin përfundimtar” thotë bashkia.
Më tej sqaron se lokali që do të dalë fitues merr përsipër që ushqimet të jenë të freskëta e të kontrolluara dhe pijet të jenë brenda afatit të skadencës.
“Ushqimi për çdo person do të jetë: Petulla me mjaltë dhe djathë, sallatë mikse, supë me mish viçi, pilaf me mish viçi (300 gr mish viç për person), kos, ëmbëlsirë të ndryshme si kasatë ose hallmë ose trileçe.
Në çmim përfshihen nga tre pije joalkoolike për çdo person të ftuar për iftar” thuhet në dokumente. /voxnews
