Një avion i ‘Air India’ me 242 persona në bord, që udhëtonte për në Londër u rrëzua menjëherë pas ngritjes në Ahmedabad, në Indinë perëndimore. Në fluturim kishte 169 shtetas indianë, 53 britanikë, shtatë shtetas portugezë dhe një kanadez. Avoini u rrëzua mbi një konvikt studentësh të mjekësisë.
Deri tani janë gjetur 204 trupa të pajetë, por nuk dihet se sa prej këtyre viktimave ishin në aeroplan ose ishin në tokë kur aeroplani u rrëzua. Ndërkohë raportohet për një të mbijetuar britanik nga rrëzimi i aeroplanit të Air India, i cili ndodhet nën kujdesin e mjekëve.
Mediat indiane thonë se kanë folur me të mbijetuarin, Vishwash, në spital, i cili ndau kartën e tij të udhëtimit, e cila tregonte emrin dhe numrin e vendit të tij në avion.
“Tridhjetë sekonda pas ngritjes, pati një zhurmë të fortë dhe pastaj aeroplani u rrëzua. E gjitha ndodhi kaq shpejt.“-u shpreh ai.
Hetimi
Nga hetimet e deritanishme konfirmohet se piloti i avionit, me eksperiencë të gjatë në fluturime, ka dhënë sinjalin SOS pak sekonda para rënies mbi një konvikt studentësh të mjekësisë, ku rreth 60-të prej tyre kanë mbetur të plagosur ndërsa 5 rezultojnë të zhdukur. Rindërtimet fillestare dhe videot që qarkullojnë në internet po nxisin hipoteza teknike rreth një ngritjeje të mundshme jonormale: ndër to, përdorimi i reduktuar i pistës dhe konfigurimi i gabuar i krahëve.
Ngritje nga mesi i pistës: Disa video që qarkullojnë në mediat sociale tregojnë Boeing 787 duke filluar ngritjen e tij shumë përtej pikës së zakonshme. Sipas vëzhguesve online, avioni do të kishte përdorur vetëm gjysmën e gjatësisë së disponueshme të pistës 23 në aeroportin e Ahmedabadit. Kjo zgjedhje, e pazakontë për një avion të asaj madhësie dhe peshe, mund të kishte ulur ndjeshëm kufirin e sigurisë së nevojshme për një ngjitje të qetë.
1,700 metra pistë të përdorura, u nevojitën 3,000. Një Boeing 787-8 Dreamliner i ngarkuar plotësisht, si ai i përfshirë në aksident dhe i destinuar për një fluturim ndërkontinental për në Londër, mund të peshojë deri në 227 ton (Pesha Maksimale e Ngritjes). Në kushte të tilla, kërkon një pistë ngritjeje prej të paktën 2,800–3,000 metrash, varësisht nga moti dhe kushtet operative. Pista 23 në aeroportin e Ahmedabadit mat afërsisht 3,505 metra, por sipas videove, avioni filloi fluturimin e tij nga rreth gjysma e rrugës, ose pak mbi 1,700 metra: një distancë padyshim e pamjaftueshme për një ngritje të sigurt në ato kushte.
Një detaj që doli nga videot ka të bëjë me konfigurimin e krahëve të avionit:sipas disa analistëve, avioni u ngrit me krahët plotësisht të tërhequra. Një imazh i ndarë në mediat sociale tregon qartë sipërfaqen e krahut pa zgjatjen tipike të tyre gjatë ngritjes. Fletët janë pajisje të lëvizshme të vendosura në skajin e pasmë të krahëve, të projektuara për të rritur ngritjen në shpejtësi të ulët. Në kushte normale, një Boeing 787-8 ngrihet duke përdorur një konfigurim të fletëpalosjes midis 5 dhe 15 gradëve, varësisht nga ngarkesa dhe pista.
