Kandidatura e aktorit Florian Binaj për zgjedhjet e Bashkisë Tiranë, ka marrë mbështetjen Adriatik Lapaj ka Lëvizja ‘Shqipëria Bëhet’. Ka qenë vetë Adriatik Lapaj i cili ka njoftuar se ka vendosur të mbështesë kandidatin e pavarur Binajn në garën për kryebashkiak.
Sipas tij, vendimi vjen si pjesë e një qëndrimi të qartë për të përkrahur kandidatë të angazhuar qytetarë dhe jo të dalë nga marrëveshje politike. Lapaj thekson se kjo mbështetje është në vazhdën e një propozimi të bërë disa ditë më parë nga lëvizja, për të përzgjedhur kandidatë që përfaqësojnë interesin publik në një situatë të jashtëzakonshme politike dhe shoqërore.
Postimi:
Dy ditë më parë propozuam që kandidatët për bashkitë në këto zgjedhje për shkak të situatës së jashtëzakonshme duhet të vinin nga radhët e qytetarëve të angazhuar dhe jo nga marrëveshjet e partive politike. Deklaruam se do të mbështesnim një prej kandidatëve të pavarur që do të shpallnin kandidimin në këto zgjedhje. Duke shprehur vlerësimin për të gjithë ata që janë deklaruar, kryesia e Lëvizjes “Shqipëria Bëhet” ka vendosur që në Bashkinë Tiranë të mbështesë kandidatin e pavarur Florjan Binaj. Ky vendim bazohet te vullneti ynë i mirë dhe bindja që Shqipëria vlen mbi partinë.
Kujtojmë se Florian Binaj ka qenë shumë aktiv në politikë, ku ishte i angazhuar me lëvizjen “Shqipëria bëhet” e cila drejtohet nga Adriatik Lapaj. Aktivisti mori pjesë në disa protesta, ndërsa në 2024 njoftoi tërheqjen nga politika. Aktori dhe aktivisti Florian Binaj, do të hyjë në garë për zgjedhjet e pjesshme që priten të mbahen në 9 nëntor.
