Presidenti francez, Emmanuel Macron, po hap një kapitull të ri për mbrojtjen franceze: një program i ri shërbimi kombëtar ushtarak, vullnetar dhe i paguar, i cili do të zgjasë 10 muaj dhe synon të rrisë numrin e efektivëve të ushtrisë në një periudhë tensioni të shtuar gjeopolitik.
Sipas BBC, Macron pritet ta prezantojë zyrtarisht nismën së shpejti, duke e paraqitur si përgjigje ndaj “konfrontimit hibrid” me Rusinë dhe nevojës që Franca të rrisë aftësitë e saj të mbrojtjes.
Programi do të jetë plotësisht vullnetar, ndërsa pjesëmarrësit do të paguhen 900 deri në 1 mijë euro në muaj.
Ky është shërbimi i parë i këtij lloji në dekada dhe përfaqëson një kthesë të rëndësishme në qasjen franceze ndaj sigurisë kombëtare.
“Nuk ka lidhje me Ukrainën”
Mes frikës se Franca mund të përgatitet për dërgimin e trupave të rinj në front, Macron e ka mohuar prerazi këtë ide.
Ai ka theksuar se programi nuk ka për qëllim të dërgojë të rinjtë në luftë, por të krijojë një gjeneratë të përgatitur dhe të ndërgjegjshme për sfidat e reja të sigurisë.
Përballja me Rusinë dhe rikthimi i ndjenjës së shërbimit
Macron prej muajsh paralajmëron se Europa duhet të përgatitet për një realitet të ri strategjik, ku presioni rus shtrihet nga dezinformimi te sulmet kibernetike.
Për të, krijimi i një baze të gjerë vullnetarësh të trajnuar është pjesë e mbrojtjes moderne.
Shërbimi i ri vjen në një kohë kur debati mbi “mbrojtjen evropiane” ka marrë vrull dhe kur disa kryeqytete kërkojnë mobilizim më të madh qytetar përballë rreziqeve të reja.
