“Nuk jam unë, figurat e mëdha të Foggias po më kërkojnë, ju po lexoni lajmet, të gjithë po më luten, dhëndri i Pasquales, njerëz nga klani Trisciuoglio … ajo që po ndodh në Cerignola është vërtet e neveritshme”.
Këto janë disa nga bisedat e përgjuara dhe të publikuara për ‘bosin’ shqiptar Shaban Shima, 36 vjeç, i kapur një ditë më parë, i cili drejtonte një kartel shqipfolës për trafikun e drogës në Itali. Mediat italiane shkruajnë se Shima, i transferuar në Foggia, u kap ndërsa ndodhej në një klub në kryeqytet duke diskutuar pazare droge me Rocco Soldo, dhëndrin e shefit të njohur të klanit Trisciuoglio-Tolonese, Raffaele Tolonese, i njohur si “Rafanill”.
Hetuesit thonë se bisedat tregojnë nivelin e lartë të aktivitetit kriminal dhe lidhjet me qarqet mafioze lokale. Këto informacione ndihmuan në bastisjet dhe arrestimet e 24 personave, si dhe në zbulimin e një ujku të mbajtur në kafaz, i cili më vonë u lirua dhe u dërgua në një qendër rehabilitimi për kafshët e egra.
Shima furnizonte tregtarët pranë “Società Foggiana” dhe grupeve aktive në Parma dhe qytete të tjera italiane me kokainë dhe kanabis, duke shitur nga 5 deri në 10 kilogramë në të njëjtën kohë, me një volum prej rreth 40,000 dozash në muaj dhe fitime që arrinin deri në 200,000 euro.
Hetimi nisi nga DDA e Barit, ndaj Anna Tolonese, motrës së Raffaele Tolonese, e cila ishte nën hetim për krimin e fajdesë dhe u arrestua në shtator 2024. Krimi preku qytetin e Foggias, provincën përkatëse dhe disa zona të Italisë qendrore dhe veriore, duke përfshirë Emilia-Romagnan, Rietin dhe Molisen. Të përfshirë në aktivitetet kriminale ishin shtetas italianë, shqiptarë, gjeorgjianë dhe rumunë.
Gjyqtarja hetuese Marialuisa Bencivenga, duke pranuar kërkesat e prokurorit Alessio Marangelli, urdhëroi burgimin e 19 personave dhe arrest shtëpiak për 5 të tjerë. Në total, 35 persona janë nën hetim. Arrestime përfshinin, përveç Shimës, Marzio Padalino, Paolo Padalino i njohur si “Xhaxhai”, Alessio Lioce i njohur si “Pupo”, Savino Defazio, Vincenzo Gemma, Massimo Soccio dhe disa qytetarë shqiptarë nga Parma, Langhirano, Foggia dhe Rieti, si dhe disa rumunë, një grua gjeorgjiane dhe një grua moldave.
Në një bisedë përgjuar mes Shimës dhe një miku të tij, dalin në pah lidhjet me klanin Moretti-Pellegrino-Lanza dhe aleatët e tyre: Duhet të më lini një takim me ta, me vajzën e xhaxhait tim, Anna Rita Moretti, vajzën e Rocco Moretti-t.
Shima përgjigjet: Vëlla, mund ta shoh atë vajzë kur të dua. Gjithmonë e shoh dhëndrin e djalit të xhaxhait tim, Pasquale Nardellan, dhëndrin e Pasquale Moretit.
Gjyqtari hetues e identifikon Shaban Shimën si “forcën lëvizëse pas një rrjeti të gjerë trafikimi kokaine me seli në Foggia”. Ai dyshohet se blinte drogën me shumicë dhe e rishiste me çmime të fryra, duke përdorur depo, ambiente paketimi dhe sisteme të sakta kontabël për furnizimet dhe të ardhurat.
Sipas raportimeve të karabinierëve, grupi përdorte makina me ndarje të fshehta, kriptofona dhe kanale të provuara për të transferuar të ardhurat në Shqipëri, duke shfrytëzuar shoferë autobusësh dhe kamionistë. Ky sistem u bë i qartë kur në janar u sekuestruan 40,000 euro para të gatshme në një pikë ndalimi përgjatë Rrugës Shtetërore 16.
Një nga sekuestrimet e rëndësishme përfshinte 2 kilogramë kokainë nga Bolivia, e cila u konstatua se ishte 96% e pastër nga analizat laboratorike të karabinierëve.
