Prokuroria e Sarandës ka rindërtuar përmes kamerave të sigurisë dinamikën e ngjarjes së rëndë ku u përfshi turisti portugez Luis Miguel Varela Mendez, në orët e para të 18 gushtit në Ksamil.
Sipas dosjes hetimore, përplasja nisi rreth orës 05:14, kur disa turistë dolën nga lokali “Principotes” dhe qëndruan në ambientet e jashtme të plazhit “Paradise”. Pak më vonë aty mbërritën David Gjana, i njohur edhe si Heurtevent, dhe Sokrat Lipan alias Vata.
Në orën 05:16:54, pamjet tregojnë Sokrat Lipanin duke vrapuar drejt turistit francez Ibrahim Lemoie, i cili u përplas me shezllonet dhe ra në tokë. Lipan dyshohet se e goditi ndërsa ndodhej i rrëzuar.
Në orën 05:17:14 ndërhyri Luis Mendez, i cili shtyu Lipanin dhe e rrëzoi. Pasi u ngrit, Lipan iu afrua turistit portugez dhe nisi ta godiste. Gjashtë sekonda më vonë, sipas hetimeve, në sulm u përfshi edhe David Heurtevent.
Turisti Sudae Akhmat tentoi të ndihmonte shokun e tij, ndërsa përplasja u zgjerua. Në pamje shfaqet edhe Serxhi Selimi duke goditur me grushte turistin francez Ibrahim Lemoie.
Për t’u shpëtuar goditjeve, Luis Mendez vrapoi drejt detit dhe u fut në ujë. Por në orën 05:17:53, kur u afrua sërish pranë zonës ku ndodheshin kamarierët, ai dyshohet se u godit me grushte nga Serxhi Ademi dhe u shty përsëri në det.
Në orën 05:18:04, turisti portugez doli nga uji dhe u drejtua nga shezllonet e plazhit “Paradise”. Kamerat tregojnë se bluza e tij e bardhë ishte e gjakosur.
Pak çaste më vonë, David Heurtevent u largua drejt ambienteve të brendshme të “Principotes”, gjithashtu me shenja gjaku në pjesën e përparme të rrobave. Në orën 05:20:28 u largua edhe Sokrat Lipan, me bluzën e bardhë të gjakosur, i shoqëruar drejt lokalit nga kamarieri Igli Cekani.
