Arkitektja Doriana Musaj, e pranishme në protestën e 89-të qytetare para Kryeministrisë, kritikoi qasjen e qeverisë së Edi Ramës, në lidhje me ndërtimet, duke shtruar pyetjen se çfarë ka prodhuar gjithë ky ndërtim masiv në vendin tonë.
Nga sheshi, ajo tha se qeveria bëri ndërtime pa kriter në Tiranë, në bregdet, preku zonat e mbrojtura dhe tani po shkon edhe drejt maleve duke përmendur nismën e shumë kritikuar, Paketën e Maleve.
“Betoni për ta nuk është vetëm material ndërtimi, është forca e tyre. Kur betoni bëhet forma e pushtetit, ai kërkon vazhdimisht territor të ri. Nuk kurseu qytetin e vjetër, vilat, lagjet e vjetra të Tiranës, lulishtet mes pallateve. Më pas dolën nga qyteti, shkuan te tokat bujqësore. Shkoj në bregdet, Zvërnec e deri te lagunat. Dhe tani me paketën e maleve, po ngjiten drejt pyjeve dhe maleve, model që kërkon territorin e ardhshëm që mund të kthehet në kantier.
Ndryshimi i planeve, statuset e veçanta, investitori strategjik, ligji 21/24 dhe instrumentet që flasin në çdo letër për zhvillim. Kur pushteti përdor fuqinë e vet për të hapur territorin një interesi dhe pastaj e vendos atë përballë komunitetit që jeton aty, investitori strategjik bëhet levë. Çfarë ka prodhuar gjithë ky ndërtim? Kemi ndërtuar më shumë apartamente, por një çift i ri e ka të vështirë të blejë një prej tyre. Të rinjtë vazhdojnë të ikin.
Tokën bujqësore e kemi kthyer në truall. Kush po i blen të gjitha këto? Popullsia po bie, të rinjtë po largohen, familjet po bëhen më të vogla ndërsa ne vazhdojmë të ndërtojmë sikur Shqipëria po mbushet me njerëz? Miliarda euro futen në beton pa pyetur mjaftueshëm nga vijnë këto para”, tha Musai.
Ajo kritikoi edhe mënyrën se si është trajtuar problematika e trafikut në Tiranë, duke thënë se përgjegjësia është zhvendosur te qytetarët.
“Kryebashkiaku na mësonte që të ecnim me biçikletë, ta linim në shtëpi makinën. Problemi u bëmë ne. Ne bëjmë trafikun, marrim makinën, ne parkojmë keq, s’dimë të qarkullojmë”, tha arkitektja.
Ndërsa një qytetar, i pranishëm në protestën para Kryeministrisë, ka shprehur shqetësimin e tij për situatën politike, ndërsa bëri thirrje për anulimin e ligjit në zonat e mbrojtura. Më tej, qytetari u ndal te problematikat e Tiranës, duke përmendur mungesën e hapësirave, ajrit dhe trafikun e rënduar.
Sipas tij, rruga e re që po ndiqet nga qytetarët mund të sjellë shpresë për mbrojtjen e territorit.
“E kemi kuptuar se nuk ka kuptim Rama në burg, pa Berishën apo anasjelltas. Dhuna informale dhe ajo e organizuar me ligj do të vazhdojnë. Shqipëria kërkon revolucion. Mungon ajri, hapësirat, trafiku i rënduar. Të gjitha këto bëhen me leje dhe me ligj. Pavarësisht se lejet miratohen, zbatimi nuk bëhet. Ndaj mendoj se rruga e re që po ndjekim sjell shpresë për territorin. Anuloni ligjin për zonat e mbrojtura”, tha ai.
