Bashkia e Kamzës, e drejtuar nga Rakip Suli, ka dhënë një tjetër kontratë për punime sportive në Valias, dy vite pasi tenderoi ndërtimin e fushës së sportit dhe të godinës së shkallareve. Në të dyja procedurat, kompania Shëndelli rezulton pjesë e bashkimit fitues të operatorëve.
Tenderi i ri ka objekt “Ndërtim fusha sportive + parking dhe rrugë, Valias”, me fond limit 63 milionë lekë. Fitues është shpallur bashkimi i kompanive Shëndelli dhe Totila, me ofertë 40.5 milionë lekë.
Shëndelli do të realizojë 90% të punimeve, ndërsa Totila 10%. Në procedurë morën pjesë 11 operatorë, pesë prej të cilëve u skualifikuan.
Kjo kontratë pason tenderin e vitit 2024 për ndërtimin e fushës së sportit në Valias dhe të godinës së shkallareve. Procedura kishte fond limit 221 milionë lekë dhe parashikonte përfundimin e punimeve brenda gjashtë muajve.
Fitues atëherë u shpall bashkimi Shëndelli, Asi-2A Co dhe Zdrava, me ofertë 204 milionë lekë. Shëndelli kishte rreth 53% të punimeve. Në garë ishte paraqitur edhe një ofertë prej 158 milionë lekësh, por nga informacioni i paraqitur nuk sqarohet arsyeja pse ajo nuk u përzgjodh.
Vlera e ofertave fituese në të dy tenderët arrin gjithsej 244.5 milionë lekë. Procedura e re ngre pikëpyetje mbi planifikimin e investimit: përse fushat shtesë, parkimi dhe rrugët u tenderuan veçmas dhe si lidhen këto punime me projektin fillestar?
Zhvendosja e stadiumit nga qendra e Kamzës në Valias lidhet me ndërtimin e godinës së re të bashkisë në truallin e stadiumit të vjetër.
Për këtë projekt, në vitin 2024 u hap tenderi për një parkim me një kat nëntokë, godinën trekatëshe të bashkisë dhe rehabilitimin e sheshit. Fondi limit ishte 533,886,935 lekë, ose rreth 533.9 milionë lekë.
Këto investime kërkojnë transparencë mbi nevojën për një godinë të re administrative, kostot e zhvendosjes së stadiumit dhe arsyet e kontratës shtesë në Valias. Pjesëmarrja e së njëjtës kompani në dy kontratat nuk provon vetvetiu abuzim, por arsyetimi i shpenzimeve dhe vlerësimi i ofertave mbeten çështje që bashkia duhet t’i sqarojë. /korrieri
