Qyteti Studenti ishte stacioni i fundit i dhunës që përfshiu Tiranën mbrëmjen e 15 tetorit. Pas sulmeve ndaj institucioneve shtetërore, bizneseve dhe pronës publike, tensionet u zhvendosën drejt zonës rezidenciale universitare, ku u dëmtuan disa prej godinave të fjetjes së studentëve.
Gjatë mbrëmjes, grupe të rinjsh thyen xhamat e dyerve dhe dritareve të konvikteve, ndërsa forca të shumta të Policisë së Shtetit dhe FNSH-së u nisën me urgjencë drejt zonës për të ndërhyrë dhe për të parandaluar dëmtime të tjera. Identiteti i personave përgjegjës për sulmet nuk është konfirmuar zyrtarisht.
Ngjarjet në Qytetin Studenti mbyllën një tjetër ditë të dhunshme protestash në kryeqytet. Ajo që nisi si revoltë e studentëve dhe të rinjve kundër qeverisë u shoqërua sërish me përplasje, sulme ndaj institucioneve dhe shkatërrime të pronës publike e private.
Tirana kaloi kështu një tjetër natë të vështirë, me një protestë që u përshkallëzua në dhunë dhe me një ndërhyrje të forcave të rendit që nuk arriti të parandalonte dëmtimet. Sulmi ndaj godinave ku jetojnë studentët e bëri edhe më shqetësuese situatën, ndërsa mbeten pikëpyetje mbi mënyrën se si u menaxhua rendi publik gjatë mbrëmjes.
