Një aksident i rëndë ka ndodhur sot pranë rrugës së Kishës së Laçit, ku një automjet luksoz tip Porsche Cayenne ka rënë nga një lartësi prej rreth 70 metrash. Brenda mjetit ndodhej një çift, të cilët kanë pësuar dëmtime të rënda si pasojë e përplasjes së fortë.
Sipas raportimeve paraprake, automjeti dyshohet se ka dalë nga kontrolli për shkak të një manovre të gabuar ose problemeve teknike, duke rënë në humnerë pranë një shtëpie. Ishin banorët e shtëpisë që arritën të nxjerrin çiftin nga mjeti i dëmtuar rëndë dhe më pas i mori ambulanca.
Të plagosurit janë transportuar me urgjencë në spital, ku ndodhen nën kujdes intensiv. Gjendja e tyre raportohet kritike, ndërsa autoritetet po hetojnë shkaqet e aksidentit.
Rruga e Kishës së Laçit njihet si një zonë me terren të vështirë dhe kthesa të rrezikshme, duke qenë shpeshherë skenë aksidentesh të rënda. Ky incident ka rikthyer vëmendjen te nevoja për përmirësimin e masave të sigurisë në këtë aks rrugor.
