Një tender për rehabilitimin e rezervuarit të Kurjanit mund të hapë një tjetër kapitull problematik për administratën e kryebashkiakes së Roskovecit, Majlinda Bufi, vetëm pak muaj pasi ajo u shpall e pafajshme nga Gjykata e Posaçme për akuzën e ngritur nga SPAK lidhur me zgjedhjet vendore të vitit 2023.
Këtë herë, në qendër të vëmendjes është një kontratë publike me vlerë afro 150 milionë lekë, për të cilën Kontrolli i Lartë i Shtetit ka konstatuar shkelje në procedurat e prokurimit, mangësi në dokumentacionin e kompanive fituese dhe probleme serioze me realizimin e punimeve.
Ajo që bie veçanërisht në sy është diferenca prej mbi 23 milionë lekësh ndërmjet penaliteteve të përllogaritura nga audituesit dhe atyre që ka llogaritur vetë administrata e Bashkisë Roskovec.
Investimi kishte si objekt rritjen e sigurisë së digës dhe përmirësimin e kapacitetit ujëmbledhës të rezervuarit të Kurjanit, ndërsa procedura e prokurimit u zhvillua në tetor 2024, gjatë mandatit të Majlinda Bufit.
Në garën me fond limit 153 milionë lekë pa TVSH, fitues u shpall bashkimi i kompanive K.M.K dhe Caushi M, me ofertë rreth 125.4 milionë lekë pa TVSH.
Por sipas raportit të KLSH-së, kompanitë që morën kontratën nuk kishin përmbushur të gjitha kërkesat e vendosura nga vetë bashkia.
Audituesit zbuluan se në dokumentet e paraqitura nuk ishte deklaruar inxhinieri gjeodet, një pozicion i kërkuar për kualifikimin në tender.
Në dosje rezultonin gjithashtu kontrata pune të skaduara për një hidraulik, si dhe dy punonjës ndërtimi të deklaruar që nuk figuronin në listëpagesën përkatëse.
Një tjetër parregullsi ishte mospërputhja mes emrit të inxhinieres hidroteknike të deklaruar elektronikisht dhe personit të paraqitur në dokumentacionin fizik.
KLSH vlerëson se këto mangësi duhej të kishin sjellë një shqyrtim tjetër të ofertës dhe ngarkon me përgjegjësi Komisionin e Vlerësimit të Ofertave, i cili kishte miratuar kualifikimin e bashkimit fitues.
Tenderi kishte qenë objekt kundërshtimesh që në momentin e zhvillimit. Kompania ZDRAVA kërkoi rrëzimin e vendimit për kualifikimin e fituesit, por ankesa nuk u pranua nga Komisioni i Prokurimit Publik.
Ndërkohë, problemet me këtë investim nuk përfunduan me nënshkrimin e kontratës.
Punimet, të nisura në dhjetor 2024, kishin një afat fillestar gjashtëmujor. Bashkia pranoi më pas një shtyrje tjetër deri në dhjetor 2025, por edhe ky afat u tejkalua.
Në kontrollin e kryer gjatë vitit 2026, audituesit konstatuan se deri më 1 qershor ishin regjistruar 165 ditë vonesë, ndërsa punimet e papërfunduara në afat përfaqësonin një vlerë prej rreth 47.8 milionë lekësh.
Për këtë vonesë, KLSH përllogariti penalitete kontraktuale prej 31.5 milionë lekësh, duke rekomanduar ndjekjen e procedurave për arkëtimin e shumës nga kompanitë.
Por administrata e drejtuar nga Bufi doli me një përllogaritje tjetër.
Komisioni i bashkisë e uli vlerën e penaliteteve në rreth 8.3 milionë lekë, ndërsa mbikëqyrësi i punimeve propozoi një shumë edhe më të vogël, prej 4.3 milionë lekësh.
Këto diferenca janë argumentuar me interpretimin e afateve kontraktuale dhe pengesat e shkaktuara nga përmbytjet, moti i keq dhe problemet me energjinë elektrike.
Audituesit kanë pranuar se dokumentet e paraqitura pas kontrolleve kërkojnë verifikime shtesë për të përcaktuar se cilat vonesa janë përgjegjësi e kontraktorit. Megjithatë, ata nuk e kanë tërhequr rekomandimin për rikuperimin e 31.5 milionë lekëve, të llogaritura mbi dokumentacionin e administruar gjatë auditimit.
Në raport evidentohen edhe mangësi në dokumentimin e volumeve të punimeve dhe mosaktivizimi i mekanizmit të garancisë së kontratës, me vlerë afro 15 milionë lekë.
Për këto konstatime, KLSH kërkon nxjerrjen e përgjegjësive administrative për procedurën e tenderit, vlerësimin e masave ndaj mbikëqyrësit dhe ndjekjen e detyrimeve financiare që rrjedhin nga mosrealizimi në afat i investimit.
Gjetjet rikthejnë vëmendjen te drejtimi i Bashkisë Roskovec nga Majlinda Bufi, e cila më 1 korrik 2026 u shpall e pafajshme nga Gjykata e Posaçme në procesin për përdorimin e funksionit publik për veprimtari politike ose zgjedhore.
Në atë çështje, SPAK kishte kërkuar dënimin e kryebashkiakes me një vit e gjashtë muaj burg, por gjykata nuk e konsideroi të provuar akuzën.
Raporti për rezervuarin e Kurjanit nuk përcakton përgjegjësi penale personale të Bufit dhe nuk konfirmon se ndaj saj ka nisur një procedim i ri.
Megjithatë, shkeljet e konstatuara në përzgjedhjen e fituesve, vonesat në përfundimin e investimit dhe diferenca e madhe në llogaritjen e penaliteteve ngrenë pyetje mbi kontrollin dhe administrimin e fondeve publike nga institucioni që ajo drejton.
Mbetet për t’u parë nëse përgjegjësitë do të kufizohen te komisionet dhe strukturat administrative të bashkisë, apo nëse dokumentacioni i tenderit do të bëhet objekt i një verifikimi më të thelluar nga organet e drejtësisë.
Në çdo rast, përpara se të diskutohet përgjegjësia penale, Bashkia Roskovec duhet të japë përgjigje për një çështje konkrete: përse një investim prej 150 milionë lekësh u shoqërua me shkelje të dokumentuara nga KLSH dhe përse administrata bashkiake llogariti mbi 23 milionë lekë më pak penalitete sesa audituesit e shtetit? /korrieri
















