DETAJET/ Si u vra punëtori Nusret Xhoka te 2A Group gjatë ndërtimit të Aeroportit të Vlorës, a bën Behgjet Pacolli dhe Valon Ademi gjithçka për sigurinë e punëtorëve
Një punëtor ndërroi jetë mbrëmjen e 17 janarit në kantierin e ndërtimit në aeroportin e Vlorës.
Viktima, Nusret Xhoka (60 vjeç) nga Dibra u përplas nga një fadromë që drejtohej nga 63 vjeçari, nga Prishtina, Rrahman Sllamniku.
Të dy ishin punësuar pranë kompanisë “2A Group” në aeroportin e Vlorës.
Fadroma ka përplasur shoferin, Nusret Xhoka, i cili sapo kishte zbritur nga mjeti i tonazhit të rëndë, dhe për pasojë ka ndërruar jetë në vend.
Policia e Vlorës tha se ka arrestuar 63 vjeçarin, pasi dyshohet se duke drejtuar një fadromë, ka humbur kontrollin mbi drejtimin e saj dhe ka përplasur një trajler.
Njoftimi i policisë:
Specialistët për Hetimin e Krimeve në Komisariatin e Policisë Vlorë arrestuan shtetasin Rr. S., 63 vjeç, banues në Prishtinë, Kosovë, pasi dyshohet se më datë 17.01.2025, rreth orës 21:20, në kantierin e ndërtimit të Aeroportit të Vlorës, duke drejtuar një fadromë, ka humbur kontrollin mbi drejtimin e saj dhe ka përplasur një trajler.
Si pasojë, drejtuesi i trajlerit, shtetasi N. Xh., 60 vjeç, banues në Dibër, ka humbur jetën.
Kujtojmë se punimet e Aeroportit Ndërkombëtar të Vlorës, po bëhen nga dy biznesmenë të suksesshëm kosovarë.
Behgjet Pacollin me “Mabetex Group” dhe bashkëpunëtorin e tij, Valon Ademi, me “2A Group” të njohur ndërkombëtarisht për investimet e tyre. /korrieri
