Meteorologia Tanja Porja ka zbuluar se si do të jenë kushtet e motit gjatë ditëve në vijim.
Porja tha se prej të martës pritet që të pakësohen reshjet e shiut dhe të dëborës, por shtoi se pritet një rënie e ndjeshme e temperaturave, e cila nis që sot dhe vijon edhe më vonë.
Porja tha gjithashtu se temperaturat minimale në territorin e Shqipërisë pritet të shkojnë deri në -7 gradë celcius.
“Reshje të herëpashershme gjatë ditës së sotme, kryesisht në veri dhe zonat qëndrore, shumë më të pakta në zonat jugore. Vonë në mbrëmje presim përmirësim të situatës në të gjithë territorin shqiptar. Mbeten të pakta reshjet prezentë, kryesisht në zonat kufijtare lindore, ndërsa pjesa tjetër do të mjaftohet me vranësira. Termometri sot shënon rreth 0 deri në -1 gradë celcius në orët e para të ditës, 15-16 gradë në orët e mesditës.
Mbeten të pakta gjatë ditës së martë, kryesisht reshje dëbore në zonat veriore të vendit. E njëjta situatë edhe për të mërkurën, ku presim momente të shkurtra me flokë dëbore. E enjtja, e premtja, e shtuna dhe për disa ditë me radhë, mundësia për reshje do të jetë thuajse zero. Ajo që presim është ulja e temperaturave.
Ulen temperaturat sot në mesditë me rreth 2-3 gradë krahasuar me ditët e fundjavës, ndërsa nga e marta dhe në vijim presim vetëm rënie të vlerave termike. Si në orët e mëngjesit me të paktën 2 gradë deri në mesjavë, ndërsa në mesditë një rënie më të lehtë dhe më graduale. Nesër presim -3 dhe 14 gradë, ndërsa në ditët në vijim presim temperatura deri në -7 gradë celcius”, tha meteorologia Porja në A2CNN.
