Policia Rrugore ka zbardhur dinamikën e aksidentit tragjik në Fushë Prezë ku humbën jetën 4 të rinj.
Sipas referimit të kamerave të sigurisë automjeti tip Mercedes Benz ku ndodheshin të rinjtë ka parakaluar edhe kamionë të tjerë që lëviznin në rrugën Vorë-Fushë Krujë. Më pas kanë hyrë sërish në karrexhatë dhe janë përplasur me betonierën që kishte ndaluar pa sinjalistikën përkatëse.
Drejtuesi 24-vjeçar i betonieres ka deklaruar se i kishte mbaruar nafta sapo kishte hyrë në rrugë kryesore dhe i ishte fikur mjeti. Ka provuar të ndezë dhe më pas ka shkuar në një karburant që ishte aty pranë për të marrë naftë. Në dëshminë e tij ai thotë se ka harruar të ndezë bllokazhin e betonieres.
Sipas grupit hetimor përplasja ka qenë e fortë dhe ka ardhur për dy arsye për shkak të shpejtësisë së lartë dhe mungesës së fushëpamjes për shkak se mjeti ka parakaluar dhe nuk e parë betonieren e ndaluar.
Sipas policisë në momentin e përplasjes mjeti ka qenë më shpejtesi rreth 170 km në orë ndërsa gjatë lëvizjes kur ka kryer dhe parakalimin mund të ketë qenë më shpejtësi rreth 200 km në orë.
Ndërkohë është arrestuar shoferi 24-vjeçar i betonieres Aleksandër Krrashi për mungesë të patentës, 25-vjeçari V.K. kushëri i shoferit të betonieres, pasi e ndihmoi atë të largohej nga vendngjarja dhe 34-vjeçari D.K., menaxheri i firmës së betonit që kishte punësuar 24-vjeçarin. Si dhe është shpallur në kërkim administratori i firmës së prodhimit të betonit.
Si pasojë viktimë e këtij aksidenti mbetën 25-vjeçari Enejdi Laçi që drejtonte mjetin, vëllai i tij Erildi Laçi 20 vjeç, kushëriri i tyre Andi Laçi 22 vjeç dhe shoku Enrikejd Kurti 24 vjeç. Ata u dogjën brenda mjetit Benz që shpërtheu në flakë pas përplasjes me betonieren.
