Policia e Tiranës thotë se ka gjetur në zonën e Mulletit, më konkretisht në fshatin Fikas, një motor të djegur.
Ky motomjet dyshohet se është përdorur nga autorët e atentatit në Lundër më 17 Prill, ku mbetën të plagosur 4 persona, mes të cilëve dy fëmijë.
“Në vijim të kontrolleve të pandërprera dhe të veprimeve hetimore që po kryhen nga grupi i posaçëm hetimor, në drejtimin e Prokurorisë, me qëllim zbardhjen e rrethanave të ngjarjes së ndodhur më datë 17.04.2025, në Lundër, ku u qëllua me armë zjarri në drejtim të një automjeti me të cilin qarkullonin 4 shtetas, shërbimet e Policisë, ditën e sotme, kanë gjetur në afërsi të fshatit Fikas, Mullet, një motomjet të djegur, i cili dyshohet se është përdorur nga autorët e kësaj ngjarjeje”, njoftoi policia.
Si pasojë e të shtënave atë mbrëmje, përveç makinës tip “G Class” që ishte në shënjestër, plumbat kanë prekur edhe një mjet tjetër që po lëvizte aty, por fatmirësisht pa dëme në jetë.
Shoferi që drejtonte një makinë tip “Ford” është larguar me shpejtësi i frikësuar dhe nga të shtënat është dëmtuar mjeti në pjesën e trasesë ku e ka prekur një nga 33 plumbat e derdhur në atentat.
Ai ka deklaruar se nuk kishte shquar dot autorët pasi çdo gjë kishte ndodhur shumë shpejt.
Grupi i hetimit, i cili për shkak të asaj që përfaqësojnë personat që ranë pre e atentatit, 34-vjeçari Arenc Tafa, por edhe 3 të tjerët, 19, 17 dhe 11 vjeç, pa lidhje të mundshme kriminale dhe të mitur beson se autorët kanë ngatërruar objektiv.
Bazuar në llojin e makinës “G-Class” hetuesit kanë marrë në pyetje persona të tjerë që jetojnë në të njëjtën zonë dhe që përdorin një makinë të tillë.
Megjithatë, burimet thonë se hetuesit nuk kanë përjashtuar asnjë pistë, duke verifikuar edhe konflikte të mundshme të pronarëve të makinës./korrieri
