Një 24-vjeçar nga Kosova, i identifikuar si Endrit Ademi, ka humbur jetën mëngjesin e sotëm në Milano, pas ra nga kati i tretë i një pallati, ndërsa po punonte për një ndërhyrje në fasadë.
Ademi jetonte në Itali prej 6 vitesh, kurse prindërit dhe një nga vëllezërit jetojnë në Kosovë. Ndërsa një vëlla tjetër jeton në Austri.
“Ai ishte një djalë i mirë, një mik i imi”, tha një bashkatdhetar i Endritit, pas tragjedisë që ndodhi para syve të tij.
Si ndodhi ngjarja
Sipas raportimeve fillestare, rreth orës 9:30 të ditës së sotme, i riu kosovar ka rënë nga një skelë. 24-vjeçari po kryente punime rutinore mirëmbajtjeje, në katin e tretë të një apartamenti.
Për arsye që janë ende të paqarta, ai rrëshqiti dhe ra nga afërsisht 12 metra lartësi, duke vdekur në vend.
Prokuroria Publike e Milanos ka nisur hetimet për zbardhjen e ngjarjes ndërsa trupi i pajetë do t’i nënshtrohet autopsisë dhe të gjitha kontrolleve të nevojshme për të verifikuar kushtet e sigurisë së punëtorit. /korrieri
