Dritan Gjika, 47-vjeçari shqiptar i identifikuar si kreu i një organizate kriminale me bazë në Ekuador, është arrestuar në Emiratet e Bashkuara Arabe.
Ai ishte i shpallur në kërkim ndërkombëtar nga Interpol për trafik droge, pastrim parash dhe përfshirje në organizatë kriminale.
Sipas të dhënave zyrtare të migracionit, Gjika hyri për herë të parë në Ekuador në vitin 2009 me vizë turistike.
Në vitet në vijim, ai u paraqit si një biznesmen i suksesshëm, ndërkohë që autoritetet zbuluan se aktivitetet e tij të vërteta ishin të lidhura me botën e krimit, veçanërisht në zonën bregdetare të vendit.
Ai jetonte në luks, me makina të shtrenjta e të blinduara dhe prona banimi, duke u përpjekur të maskonte aktivitetin kriminal përmes fasadës së një jete normale dhe të suksesshme, raporton media ekuadorian El Universo
Gjika kishte ndërtuar një rrjet të mirëorganizuar që trafikonte drogë nga Lugina e Kaukës në Kolumbi drejt Ekuadorit, ku lënda narkotike depozitohej në ferma dhe më pas dërgohej në porte për t’u futur në kontejnerë.
Kompanitë e përdorura për këtë proces paraqiteshin si biznese të ligjshme, ndërsa rruga e trafikimit përfshinte Ekuadorin dhe Spanjën, me destinacion përfundimtar Belgjikën, Holandën, Turqinë dhe Shqipërinë.
Sipas autoriteteve, Gjika kishte ngritur një strukturë të ndërlikuar bashkëpunëtorësh që mbulonin logjistikën, pagesat dhe transferimet e pasurive në emër të palëve të treta, për të fshehur burimin e të ardhurave.
Ai ishte nën mbikëqyrje për shkak të lidhjeve të dyshuara me Rubén Cherres, një figurë e njohur në Ekuador për ndikimin e tij në ndërmarrjet publike dhe për përpjekjet për të ndikuar në emërime politike. Cherres u vra më pas në rrethana misterioze.
Gjika, që posedonte gjithashtu dokumente ekuadoriane, drejtonte biznese nga qyteti Guayaquil, përfshirë një kompani importi.
Në vitin 2024, një operacion i përbashkët mes autoriteteve të Ekuadorit dhe Spanjës çoi në shpërbërjen e rrjetit të tij kriminal. Gjatë këtij operacioni, u arrestuan 30 persona në provincat Guayas, Los Ríos, Cotopaxi, Azuay, Santa Elena dhe El Oro. Të arrestuarit ishin shtetas nga Ekuadori, Spanja, Argjentina, Kolumbia dhe Kina.
Gjithsej u zhvilluan 57 kontrolle të befasishme 40 në Ekuador dhe 17 në Spanjë me pjesëmarrjen e rreth 750 oficerëve të rendit.
Hetimet zbuluan se rrjeti trafikonte drogë përmes ngarkesave të ligjshme, si bananet, të cilat shërbenin për të maskuar drogën në kontejnerë. Përmes 10 kompanive të dyshuara për pastrim parash gjashtë në Ekuador dhe katër në Spanjë ishin përfituar dhe pastruar mbi 32 milionë dollarë.
Policia deklaroi gjithashtu se organizata përdorte kartëmonedha të koduara për të identifikuar transaksionet, ndërsa një shtetas kinez ishte përgjegjës për qarkullimin e parave brenda territorit ekuadorian.
Kapja e Dritan Gjikës u bë e mundur falë bashkëpunimit mes njësisë së Interpolit në Ekuador dhe partnerëve të saj në Abu Dhabi, në kuadër të projektit ndërkombëtar PAcCTO 2.0, i cili mundësoi shkëmbimin e informacionit për arrestimin dhe procedurat e ekstradimit.
Në shkurt të vitit 2024, Prokuroria e Përgjithshme e Ekuadorit e identifikoi zyrtarisht Gjikën si drejtuesin e rrjetit të mafies shqiptare në vend, pas një kontrolli të zhvilluar në një banesë luksoze në Guayaquil.
