Një shqiptar i dënuar në Itali për trafik droge ka argumentuar në Gjykatën e Britanisë së Madhe se nuk duhet të deportohet në Itali, pasi kjo do t’i rrezikonte shanset e dy djemve të tij për t’u bërë futbollistë profesionistë.
Elis Lila, 40 vjeç, u dënua në Itali me 11 vite burg për përfshirje në një grup kriminal që merrej me trafikun e lëndëve narkotike.
Ai u largua nga Italia në mënyrë të paligjshme, duke kaluar fillimisht në Shqipëri dhe më pas në Britaninë e Madhe, ku jeton që nga viti 2016 së bashku me bashkëshorten dhe fëmijët.
Në përpjekje për të shmangur ekstradimin, Lila paraqiti në gjykatë argumentin se kthimi i tij në Itali do të shkelte të drejtën për një jetë familjare, të garantuar nga neni 8 i Konventës Europiane për të Drejtat e Njeriut.
Ai deklaroi se dy djemtë e tij janë pjesë e një klubi futbolli dhe kanë “shanse reale” për t’u bërë profesionistë, ndërsa djali i madh është pranë përfitimit të një burse nga një klub i Premier League.
Sipas avokatëve të tij, mbështetja morale dhe prania e babait janë thelbësore për zhvillimin e tyre sportiv.
Gjykata britanike refuzoi pretendimet e tij, duke argumentuar se Lila ishte i vetëdijshëm për përfshirjen e tij në veprimtari kriminale dhe për hetimet ndaj tij kur u largua nga Italia, prandaj nuk mund të pretendojë mbrojtje ligjore në këto rrethana./DailyMail
