Grupi i kokainës, SPAK bastis “Klajdi Resort” në Golem, sekuestrohet celulari i pronarit Osman Kokoshi
SPAK ka zhvilluar një operacion të gjerë në disa qytete të vendit, duke goditur një organizatë të trafikut ndërkombëtar të kokainës me lidhje nga Amerika Latine drejt Evropës.
Në kuadër të aksionit, VNA raporton se është bastisur “Klajdi Resort” në Golem, ku u sekuestrua celulari i pronarit Osman Kokoshi, i dyshuar për përfshirje në aktivitetin e grupit. Kontrollet janë kryer edhe në biznese të tjera të lidhura me anëtarët e dyshuar.
Lista e personave të përfshirë përfshin Riza, Ardian, Albin dhe Elvis Çelën (vëllezër), Fadil alias Jul Balla – pronar i “Ajman Resort”, Franc Çopja i arrestuar në Belgjikë, Petrit Sulejmani alias “Lakatos”, Mariglen Kamami, Denis Daja, Kujtim Gjyla (me detyrim paraqitje), Renato Musaka, Vilson Pepa, Dition Pepa (me detyrim paraqitje), Miklovan Mullai dhe Gert Çerma.
Operacioni, i cili nisi në orët e para të mëngjesit në Tiranë, Elbasan, Durrës dhe Golem, vjen pas muajsh hetimesh ku janë analizuar përgjime të siguruara nga aplikacioni i enkriptuar “Sky ECC”. Sipas burimeve hetimore, grupi kishte ngritur një rrjet të mirëstrukturuar për transportimin e kokainës nga portet e Amerikës Latine drejt Evropës, duke përdorur pika strategjike në Shqipëri për magazinim dhe shpërndarje.
Burime nga dosja hetimore bëjnë me dije se Franc Çopja dhe Ervis Çela konsiderohen si figura kyçe të grupit, ndërsa Fadil alias Jul Balla dyshohet se kishte rol në logjistikën dhe transportin e lëndës narkotike.
SPAK e lidh këtë operacion edhe me disa raste të mëparshme të kapjes së kokainës në portet e Durrësit dhe Vlorës, ku janë sekuestruar sasi të konsiderueshme droge të fshehura në kontenierë me banane apo mallra të tjera importi. Sipas të dhënave, grupi përdorte metoda të sofistikuara për të shmangur kontrollet doganore, përfshirë bashkëpunëtorë brenda pikave të hyrjes.
Hetimet pritet të zgjerojnë rrethin e personave të përfshirë, ndërsa SPAK po punon për gjurmimin e pasurisë së anëtarëve të grupit dhe lidhjeve të tyre ndërkombëtare. Nuk përjashtohen arrestime të tjera në ditët në vijim. /korrieri
