Në korrik të vitit 2020, në kulmin e pandemisë Covid 19, kryeministri Edi Rama udhëtoi në Tepelenë, i shoqëruar nga ish-kryetari dhe deputeti i zgjedhur Tërmet Peçi dhe nga ish-drejtoresha e AZHBR-së, Frida Krifca. Ata shkuan në një punishte, në pronësi të Bledar Hysës.
Më shumë sesa lajmi që Bledari kishte marrë fonde nga AZHBR-ja, “lajm” në atë kohë u bë tryeza e tejmbushur me mish dhe me asortimente të tjera. Natyrisht Tërmet Peçi njihet si një nga mbështetësit më të mëdhenj të Ramës, ku e pret me këngë dhe vallë.
Edi Rama dhe ish-kryetari i Bashkisë së Tepelenës Tërmet Peçi në vitin 2020
Por në atë kohë ai tentoi që të dëndte me mish edhe kreun e qeverisë, i cili kishte dalë për të vizituar biznesmenë dhe njerëz që kishin marrë fonde. Koha kaloi dhe i njëjti personazh, personi që shtroi tryezën, fitoi një tender me vlerë të vogël nga Bashkia e Tepelenës. Institucioni tashmë drejtohet nga të besuarit e Tërmetit.
Njoftimi i fituesit të tenderit për prerjen e pemëve në zonën e Ujit të Ftohtë në Tepelenë
Njoftimi i fituesit të tenderit për prerjen e pemëve në zonën e Ujit të Ftohtë në Tepelenë
Sipas dokumenteve që disponon VoxNews, Bashkia e Tepelenës ka finalizuar ditët e fundit tenderin me objekt “prerje pemësh që përbëjnë rrezik për jetën e qytetarëve dhe subjekteve në zonën e Ujit të Ftohtë”. Fitues i procedurës doli “HB-GROUPCONSTRUCTION” në pronësi të Bledar Hysës.
Në dokumentet e publikuara nuk ka një vlerësim të saktë të pemevë nga inxhinierët pyjore. Por vetëm një procedurë nga bashkia, e cila ka vendosur që të presë një “qershi të egër”, e cila është e trashë 50 centimetra dhe 14 metra e lartë. Për këtë pemë, bashkia thotë se është 80 % e tharë.
Nërkohë ka vendosur që të presë një “rrap” me gjerësi 120 centimetra dhe 20 metra të lartë. Për këtë pemë bashkia shkruan se është 90 % e tharë. Pema e tretë është një “plep kanadez” 80 cm i gjerë dhe 19 metra i lartë.
Më shumë sesa rreziku, prerja duhet të jetë vendosur nga biznese që po lulëzojnë dita-ditës te Uji i Ftohtë, ku janë bërë hotele dhe disa projekte janë në vijim e sipër. A mos ndoshta prerja bëhet për të liruar ndonjë truall të ri për hotele në atë zonë?!
