Këngëtari i serenatave korçare, Astrit Koçibelli, është ndarë sot nga jeta.
Lajmi është bërë i ditur nga Qendra e Artit dhe Kulturës në Korçë përmes një postimi në rrjetet sociale, ku shprehet hidhërimi për humbjen e një prej figurave më përfaqësuese të serenatës.
“Lamtumirë Astrit Koçibelli! Korça humbi sot një nga serenatistët e saj më të dashur. Me zërin dhe shpirtin e tij, Astriti u bë pjesë e historisë së serenatës korçare. Këngët e tij do të vazhdojnë të jetojnë si kujtim i gjallë i dashurisë dhe artit të qytetit tonë”, thuhet në deklaratën zyrtare.
Astrit Koçibelli është një nga emrat më të dashur të muzikës tradicionale korçare. Koçibelli u bë i njohur për interpretimin e këngëve korçare, duke sjellë për publikun emocionin e serenatës së vjetër me një stil autentik dhe të dashur për të gjitha moshat.
Gjatë viteve të karrierës së tij, ai kontribuoi në ruajtjen dhe promovimin e traditës muzikore korçare, duke u bërë një figurë kyçe për brezat e rinj të artistëve që dëshirojnë të mbajnë gjallë këtë trashëgimi.
