Me sy e veshë të mbyllur ndaj çdo zëri kundërshtues, mazhoranca socialiste po marshon me kokëfortësi drejt votimit të hartës së re territoriale më 8 tetor. Nisma tashmë po udhëhiqet me dorë të hekurt nga Ulsi Manja, i cili nuk e la t’i prishej “festa” as nga përpjekjet e minutës së fundit të Erion Veliajt.
Veliaj i dërgoi një letër zyrtare Kuvendit nga qelia ku i kërkonte ndalimin e miratimit me argumentin se Tirana nuk është konsultuar fare për këtë proces. Mirëpo, përplasjet e vjetra dhe inatet e mbartura nga koha kur Manja shërbente si Ministër i Drejtësisë — ndërsa Veliaj ankohej publikisht për kushtet dhe keqtrajtimin në burg — duket se nuk e kanë zbutur aspak qëndrimin e Manjës për ta çuar nismën deri në fund.
Kështu, PS po injoron jo vetëm opozitën dhe qytetarët që protestojnë në rrugë, por edhe zërat kritikë që i vijnë nga brenda radhëve të veta.
Përplasja u përshkallëzua si brenda ashtu edhe jashtë dyerve të parlamentit. Ndërsa në Kryesinë e Kuvendit deputetët e PS-së refuzonin të dëgjonin kërkesat e opozitës, jashtë godinës një grup qytetarësh nga Memaliaj protestonin kundër shkrirjes së bashkisë së tyre dhe bashkimit me Tepelenën.
Në Komisionin e Ligjeve, opozita kërkoi ndërprerjen e menjëhershme të procedurës për sa kohë nisma e PD-së ndodhet ende për konsultim në këshillat bashkiakë. Oerd Bylykbashi denoncoi nxitimin e mazhorancës për të centralizuar pushtetin:
“Kur Kuvendi i Shqipërisë ka dërguar atë pr.ligj për konsultim, ky proces nuk mund të vazhdojë. Është hartuar një kalendar që presupozonte një situatë tjetër. Në këto kushte, duhet që kjo të mos vazhdojë më tej. Duhet që të merret edhe pse është me vonesë. Duhet të presim kush është qëndrimi i bashkive në lidhje me pr.ligjin e ri. Këshillat bashkiakë të shprehen për atë. Vetëm atëherë Kuvendi do të jetë në gjendje të shqyrtojë si duhet dy nisma ligjore që janë në të njëjtën kohë për dy çështje, por me qëndrime të ndryshme: njëri që ta çojë pushtetin vendor te kryeministri që s’i ndahet shpirti nga kryetari i bashkisë dhe tjetri t’ia çojë qytetarëve. Tjetri centralizim, tjetri decentralizim. Meqë e kemi këtë mundësi, e ndalojmë procesin”, tha Oerd Bylykbashi.
Luçiano Boçi akuzoi hapur mazhorancën për shkelje të Kushtetutës dhe shmangie të vullnetit popullor përmes referendumeve:
“Nisma juaj është antikushtetuese. Nisma duhet që të vinte bashkë me mendimin e popullatës. Ligji e thotë se përpara se të ndryshohet kufiri i një bashkie, duhet të ketë pse jo, edhe referendume. Duhet të organizoheshin referendume lokale. Zërat kundër kanë qenë edhe në popullatë, edhe në këshilla bashkiakë. Por nuk i keni dëgjuar zërat kundër”, tha Luçiano Boçi.
Pavarësisht kundërshtimeve të ashpra dhe mungesës së konsultimeve, mazhoranca mbetet e vendosur të kalojë projektligjin e saj sipas kalendarit të paracaktuar. Kryetari i komisionit, Ulsi Manja, u mjaftua duke mbrojtur procedurën formale:
“Sot do të bëhet prezantimi i gjetjeve të konsultimit publik në funksion të pr.ligjit të PS. E kam ftuar sot Maznikun që të na bëjë një prezantim, t’i administrojmë dokumentet dhe t’ua shpërndajmë dokumentet, sepse më 5 tetor është diskutimi, miratimi në parim nen për nen dhe në tërësi. Nga Kuvendi i Shqipërisë, më është bërë me dije se pr.ligji juaj është nisur menjëherë. Pra, me të njëjtën procedurë siç e keni kërkuar ju”, tha kryetari Ulsi Manja.
Ndërkohë, deputeti Arjan Ndoja nxori në pah shkeljet e rregullores brenda mbledhjes dhe refuzimin për të futur në sallë kryetarët e bashkive që kërkonin të dëgjoheshin:
“Ky pr.ligji duhet të ishte regjistruar dhe t’u shpërndahej të gjithëve. Kjo s’ka ndodhur. Kjo që kemi sot në shqyrtim është në shkelje të hapur të rregullores. Unë si deputet, besoj se asnjëri nuk ka dokumentet shoqëruese duke filluar te pr. nisma dhe më pas gjithë dokumentet shoqëruese. Unë nuk i kam. Mbledhja bëhet inefektive. Unë s’kam si marr pjesë në një mbledhje kur s’kam materiale. Për procedurë, kërkoj që mbledhja të ndërpritet derisa të kemi materialet. Gjithë anëtarët e Kuvendit duhet ta kenë. Nuk jemi thjesht dëgjues. E dyta, janë ca njerëz atje jashtë që nuk është se duan të futen të gjithë brenda, por janë kryetarët e bashkive që duan të jenë të pranishëm”, tha ai.
