Bilanci i atentatit me armë zjarri të ndodhur mëngjesin e sotëm në një lokal pranë bashkisë në Shkodër është rënduar. Ka shkuar në dy numri i viktimave, pasi pas punonjësit të IKMT-së, Armando Pali, i cili mbeti i vrarë në vendngjarje, ka ndërruar jetë në spital edhe Geridon Kraja, i njohur si shok i Palit dhe i Erogen Vasos.
Ngjarja ndodhi pranë shkollës “Kole Idromeno”, ku persona të armatosur hapën zjarr ndaj klientëve të lokalit, duke shkaktuar panik në mes të qytetit. Fillimisht raportohej për një viktimë dhe tre të plagosur, por bilanci tashmë është përkeqësuar.
Mes të plagosurve ndodhet Erogen Vaso, i njohur edhe si Erogen Brajoviç, vëllai i të arrestuarit Denis Brajoviç, si dhe një kamariere e lokalit, që u godit rastësisht nga plumbat. Vaso është një emër i njohur për policinë, pasi ka qenë anëtar i Këshillit Bashkiak të Shkodrës me Partinë Bashkimi për të Drejtat e Njeriut dhe është lidhur më herët me aktivitete kriminale.
Policia ka identifikuar si autor të dyshuar Rakip Gilën, i cili është arrestuar pak pas ngjarjes. Atij iu sekuestruan arma e krimit dhe motori me të cilin u përpoq të largohej. Gila u kap në zonën e Urës së Trenit, pasi bëri aksident dhe tentoi të ikte në këmbë përgjatë lumit Kir. /korrieri
