Në 9 nëntor do të mbahen zgjedhjet në Bashkitë Tiranë, Vlorë, Berat, Mat, Cërrik dhe Tepelenë. Teksa janë zyrtarizuar kandidatët për garën në Tiranë, emra për postin e kryebashkiakut janë zbuluar edhe në qytetet e tjera.
Njejtë si në Tiranë edhe për Tepelenën, Partia Socialiste ka dalë me një emër surprizë. Konkretisht PS ka vendosur të kandidojë në zgjedhje me Gramoz Sakon për postin e kryetarit të Bashkisë. Emri i tij vjen pas dorëzimit të mandatit të kryetarit të bashkisë nga Tërmet Peçi, i cili u bë deputet.
Sako njihet për karrierën e tij dhjetëvjeçare si Komandant i Gardës së Republikës. Ai dha dorëheqjen në shkurt të vitit 2024. Ai ka kaluar procesin e Vetingut në vitin 2020, ndërsa rezulton të ketë një karrierë të gjatë në fushën ushtarake.
Fillimisht ai ka mbajtur pozicionin Komandantit të Togës në Gardën e Republikës së Shqipërisë, e duke vijuar më pas me kryerjen e detyrave në funksione si: Zëvendës Komandant Kompanie, Përgjegjës i Grupit të Ruajtjes së Ministrit të Rendit Publik dhe Përgjegjës në Grupin e shoqërimit të Kryetarit të Kuvendit, Shef Seksioni në Drejtorinë e Ruajtjes së Personaliteteve të Larta Shtetërore dhe Specialist në Drejtorinë e Kufijve dhe të Migracionit.
Gramoz Sako do të jetë në garë përballë, kandidatit të Partisë Demokratike, avokatit, Malo Sadiku.
