Pas disa ditësh me mot të qëndrueshëm, e enjtja sjell kthesë në kushtet atmosferike, me reshje shiu dhe rënie të lehtë temperaturash në të gjithë territorin.
Sipas parashikimeve, mëngjesi do të nisë me kthjellime në veri të vendit, por gjatë ditës vranësirat do të shtohen gradualisht, duke u bërë mesatare deri në të dendura në shumë zona.
Reshjet e shiut pritet të nisin që në orët e para të mëngjesit në jug, për t’u shtrirë më pas në pjesën tjetër të vendit. Ato do të jenë të herëpashershme dhe me intensitet të ulët, por lokalisht mund të ketë shtrëngata afatshkurtra në formën e rrebesheve të shpejta.
Temperaturat e ajrit do të variojnë nga 14 gradë minimalja deri në 20 gradë maksimalja, duke reflektuar një rënie të lehtë krahasuar me ditët e mëparshme.
Era do të fryjë nga kuadrati i lindjes, me shpejtësi mesatare rreth 7 metra në sekondë, ndërsa në zonat bregdetare dhe luginore mund të arrijë deri në 16 metra në sekondë.
Në detet Adriatik dhe Jon, valëzimi do të jetë i lehtë deri mesatar, me forcë 2–3 ballë.
Meteorologët paralajmërojnë se koha e paqëndrueshme do të vijojë edhe gjatë fundjavës, ndaj qytetarëve u këshillohet të kenë me vete çadrat dhe të shmangin lëvizjet e panevojshme gjatë momenteve me reshje më intensive.
