Gazetari Eni Ferhati ka zbuluar detaje të reja rreth atentatit pranë aeroportit të Rinasit, ku u vra 47-vjeçari Gilmando Dani, mik i afërt i Emiljano Shullazit, ndërsa mbeti i plagosur drejtuesi i mjetit, Muçi Shaljani i njohur si Sheqeri.
Sipas Ferhatit, ngjarja është fiksuar e gjitha nga kamerat e sigurisë dhe pamjet tregojnë se njërit prej atentatorëve i është bllokuar arma gjatë ekzekutimit, por menjëherë është ndihmuar nga një tjetër person i grupit që i ka dorëzuar një armë tjetër për të vazhduar zjarrin.
“Kam disa informacione se njëra prej armëve të atentatorëve duket sikur bllokohet dhe kjo zgjat rreth 30 sekonda. Në atë moment i vjen në ndihmë një person tjetër nga radhët e atentatorëve. Të tre personat kanë qenë të maskuar, nuk dihet nëse me maska të zakonshme apo me ato plastike që japin një tjetër pamje,” u shpreh gazetari.
Ferhati shtoi se autorët kanë vepruar me profesionalizëm të lartë, duke formuar një “togë pushkatimi” dhe se kishin informacion të saktë për lëvizjet e viktimës.
“Sipas kamerave të sigurisë, një prej atentatorëve me armë të shkurtër ka lëvizur në krahun e pasagjerit. Personi që përdor armën e shkurtër, që qëllon mbi Gilmando Danin, mund të kishte qëlluar edhe shoferin, por nuk ka qenë ky qëllimi. Plumbat janë fokusuar pikërisht te Dani,” deklaroi gazetari.
Ngjarja ndodhi vetëm pak metra larg aeroportit të Rinasit dhe sipas burimeve hetimore, autorët kanë qenë të përgatitur dhe kanë ndjekur makinën e blinduar të Danit për disa kilometra para se të hapnin zjarr.
