Hetimi i Prokurorisë së Posaçme për tenderët e Agjencisë Kombëtare të Shoqërisë së Informacionit ka hyrë në fazën më të rëndësishme, duke prodhuar masat e para të sigurisë ndaj zyrtarëve dhe biznesmenëve të përfshirë.
SPAK ka lëshuar urdhër-arrest për biznesmenin Ergys Agasi, ndaj të cilit më herët janë kryer kontrolle të gjera në banesa dhe ambiente biznesi në Tiranë dhe Durrës. Dy skuadra të BKH-së të shoqëruara nga Policia e Shtetit ushtruan kontroll në të paktën katër ambiente, duke sekuestruar dokumente e prova që lidhen me hetimin.
Në të njëjtën çështje, Prokuroria ka caktuar masën “arrest me burg” për biznesmenin Ermal Beqiri, pronar i “Soft & Solution”. Sipas SPAK, Beqiri dyshohet se ka përfituar shuma të konsiderueshme nga tenderët e kontestuar të AKSHI-t, të cilët dyshohet se janë paracaktuar për të favorizuar kompani të caktuara.
Ndërkohë, drejtoresha e AKSHI-t, Mirlinda Karçanaj, është vendosur në masën “arrest shtëpie”. Ajo u paraqit në SPAK pak ditë më parë dhe qëndroi mbi tre orë në Prokurorinë e Posaçme pa dhënë deklarata për mediat. Hetimi ndaj saj lidhet me dyshimet për abuzime në 12 procedura tenderuese për mirëmbajtjen e serverave dhe sistemeve të institucioneve shtetërore.
Sipas SPAK, hetimet kanë zbuluar se kriteret teknike të tenderëve dyshohet se janë diktuar nga vetë kompanitë pjesëmarrëse, duke krijuar kushte për garë të manipuluar dhe përfitime të garantuara me vlera që shkojnë në miliona euro.
Në kuadër të hetimit, janë marrë në pyetje rreth 25 zyrtarë të AKSHI-t, kryesisht anëtarë të Komisioneve të Vlerësimit të Ofertave dhe të Shqyrtimit të Ankesave, të cilët dyshohet se kanë pasur rol në procedurat e kontestuara.
Operacioni i sotëm shënon zhvillimin më të rëndësishëm në një prej çështjeve më të mëdha të korrupsionit të viteve të fundit në sektorin e teknologjisë dhe prokurimeve publike. SPAK pritet të vijojë me masa të tjera ndërsa hetimi thellohet mbi skemën e dyshuar të paracaktimit të tenderëve. /korrieri
