Drejtoresha e Përgjithshme e Agjencisë Kombëtare të Shoqërisë së Informacionit (AKSHI), Mirlinda Karçanaj, ka firmosur një urdhër për delegimin e kompetencave drejtuese, në një kohë kur ajo ndodhet në arrest shtëpie, nën hetim nga SPAK, së bashku me nën-drejtoreshen e institucionit.
Sipas urdhrit të datës 18 dhjetor 2025, Karçanaj ka deleguar kompetenca vendimmarrëse te drejtues të tjerë të AKSHI-t, duke përfshirë çështje që lidhen me drejtimin administrativ dhe funksionimin e institucionit.
Vendimi hyn në fuqi menjëherë dhe parashikon që kompetencat e deleguara të ushtrohen deri në shfuqizimin e urdhrit.
Delegimi i kompetencave vjen në një moment kritik për AKSHI-n, institucion strategjik për administrimin e sistemeve digjitale të shtetit, ndërsa drejtuesit e tij përballen me masa sigurie dhe hetime penale.
