Prezantuesi i emisionit ‘La Vita in Diretta’, Alberto Matano, 53 vjeç, dhe gazetarja e terrenit Barbara Di Palma, 46 vjeç, janë paditur për shpifje të rënduar nga kujdestarja A.S..
Gruaja 45-vjeçare ishte fillimisht nën hetim dhe më pas u dënua në nëntor të vitit të kaluar me dy vjet burg për shfrytëzim të paaftësisë mendore.
Asistentja, me origjinë nga Shqipëria, dyshohet se ka nxitur baroneshën Maria Malfatti, e cila vdiq më 31 tetor 2023 në moshën 87-vjeçare në Rovereto, duke përfituar nga rënia e saj konjitive, ta emëronte trashëgimtare universale dhe t’i linte të gjitha pasuritë me vlerë rreth pesë milionë euro. Kjo është edhe teza e mbështetur nga nëntë nipërit që u paraqitën si palë civile në proces.
Padia
Rasti i A.S. ishte trajtuar në emisionin ‘La Vita in Diretta’, transmetuar më 16 prill, kur seanca paraprake ishte ende në zhvillim. Ajo që ka zemëruar tregtaren aktuale në sektorin e restoranteve është cilësimi “djallëzore”, me të cilin ajo u cilësua si nga prezantuesi, ashtu edhe nga kolegia e tij gjatë reportazhit. Në padinë e saj, ajo ka kundërshtuar edhe hipotezën e hedhur nga dy gazetarët se ajo mund të ishte pjesë e një organizate mashtruese.
Arkivimi i kërkesës
Padia për shpifje ndaj dy gazetarëve pësoi një goditje më 25 qershor, kur zëvendës-prokurorja e Prokurorisë së Roveretos, Viviana Del Tedesco, depozitoi kërkesën për arkivim pranë gjyqtarit për hetimet paraprake. Megjithatë, 45-vjeçarja nuk u dorëzua dhe, së bashku me avokatin e saj Nicola Canestrini, paraqiti kundërshtim ndaj kërkesës së Prokurorisë. Tani dosja ndodhet në duart e gjyqtarit të seancës paraprake, i cili në ditët në vijim pritet të caktojë një seancë për të shqyrtuar çështjen dhe më pas të vendosë mbi kërkesën e mbrojtjes.
“Rikonstruksion thjesht gazetaresk”
Matano dhe Di Palma, të mbrojtur nga avokati veronez Luca Tirapelle, deklarojnë se bëhet fjalë për “një rikonstruksion thjesht gazetaresk, pa qëllim denigrues apo fyes ndaj personit të dëmtuar”. Në reportazh, për më tepër, janë cituar edhe deklarata të mikeshave të të moshuarës, të cilat e përshkruajnë sjelljen e kujdestares si “të dashur”, për të ofruar një pasqyrë të balancuar të ngjarjes. Sa i përket cilësimit “djallëzore”, “edhe pse ngjall një kuptim negativ – thuhet në memon e avokatit Tirapelle – ai në kuptimin aktual i referohet sjelljeve dinake dhe mashtruese, të cilat janë plotësisht në përputhje me veprimet e denoncueses”.
Avokati i kujdestares
Nga ana tjetër, kujdestarja, në kundërshtimin ndaj arkivimit të cështjes, pohon se “nuk ka asnjë dyshim mbi natyrën qartësisht fyese të cilësimit ‘djallëzore’ – shkruan avokati Canestrini – i cili nuk përdoret për të përshkruar sjelljen e asistentes sime, por vetë personalitetin e saj”. Sipas tij, ky është një cilësim shpifës, pasi është sinonim i “denjë për djallin, dashakeq dhe pervers”.
Avokati thekson gjithashtu se në kërkesën për arkivim, prokuroria “ka injoruar plotësisht pjesët e reportazhit të ‘La Vita in Diretta’ që lidhen me përkatësinë e zonjës S. në një organizatë fantazmë, e cila gjoja kishte planifikuar mashtrimin ndaj të moshuarës”. Sipas tij, ky është “një hamendësim pa asnjë provë dhe që asnjëherë nuk është marrë në konsideratë nga prokuroria”. Me pak fjalë, mjaftonte të lexoheshin aktet procedurale për të kuptuar se kujdestarja “nuk është quajtur kurrë djallëzore dhe as nuk është ngritur gipoteza se ishte pjesë e një organizate”. Për këtë arsye, mbrojtja kërkon që gjyqtari t’i imponojë prokurorit ngritjen e detyruar të akuzës ndaj dy gazetarëve ose, të paktën, vazhdimin e hetimeve paraprake.
