Prokuroria e Durrësit ka regjistruar një procedim penal pas përmbytjeve masive që kanë goditur qytetin. Hetimet po zhvillohen për tre vepra penale: “Shpërdorim detyre”, “Shkatërrim të pronës me përmbytje” dhe “Shkatërrim të pronës nga pakujdesia”.
Dyshohet se situate nuk është shkaktuar vetëm nga reshjet intensive, por edhe nga mosfunksionimi i sistemit të kullimit, përfshirë hidrovorët e rindërtuar me investime publike.
Në fokus të hetimit është tenderi prej 19 milionë euro, që u fitua nga bashkimi i kompanive 2T, Adriatik dhe Vëllezërit Hysa.
Kompania Adriatik zotërohet në 50% nga Petrit Kovaçi, babai i Spartak Kovaçit, ish-drejtori i Ujësjellës-Kanalizimeve të Durrësit dhe një emër i afërt me zëvendëskryeministren Belinda Balluku, e cila aktualisht hetohet nga SPAK për shkelje në tendera.
Sipas të dhënave të Open Data, Kovaçi ka lidhje familjare edhe me deputetin socialist të Fierit dhe ish-kreun e Tatimeve, Ceno Klosi.
Ndërsa kompania 2T zotërohet në 20% nga Artan Sako, vëllai i Gramoz Sakos, aktualisht kryetar socialist i Bashkisë së Tepelenës dhe ish-drejtues i Gardës së Republikës.
Ndërkohë kujojmë se si pasojë e situatës, humbi jetën punonjësi i Ndërmarrjes Komunale Plazh, A.H. Dyshohet se ai është marrë nga rrjedha e ujit teksa verifikonte dëmet në terren.
Përveç dëmeve në banesa dhe biznese, u bllokuan rrugë urbane e interurbane, shkollat u mbyllën, ndërsa institucione publike dhe spitali rajonal raportojnë probleme operative.
