Një konflikt mes disa personash në qytetin e Bulqizës ka përfunduar me tre të plagosur, të cilët janë transportuar drejt Tiranës për mjekim më të specializuar.
Ngjarja ndodhi mbrëmjen e 10 marsit dhe nisi fillimisht si një përplasje mes disa personave në qytet. Pas konfliktit të parë, shtetasit Q. B., A. T. dhe D. H. u shoqëruan nga policia në Komisariatin e Policisë Bulqizë për sqarimin e rrethanave.
Sipas policisë, rreth orës 21:00 situata u përshkallëzua sërish jashtë ambienteve të një lokali, ku familjarët e personave të shoqëruar në komisariat u përfshinë në një tjetër konflikt fizik.
Gjatë përplasjes janë konfliktuar shtetasit J. C. dhe Y. Sh. me shtetasit R. D., A. K. dhe R. T., ku si pasojë tre të fundit kanë mbetur të plagosur, dyshohet me mjete prerëse.
Të dëmtuarit janë identifikuar si Fluturim Tolle, 26 vjeç, i cili ndodhet në gjendje të rëndë shëndetësore, Adhurim Koçi, 26 vjeç dhe Renaldo Dauti, 22 vjeç. Dy të plagosurit e fundit janë dërguar gjithashtu në Tiranë për trajtim mjekësor, ndërsa ende nuk ka një konfirmim zyrtar për gjendjen e tyre shëndetësore.
Pas ngjarjes, shërbimet e policisë kanë nisur kontrolle në zonë për kapjen e dy autorëve të dyshuar, shtetasve J. C. dhe Y. Sh., të cilët janë larguar nga vendngjarja.
Grupi hetimor vijon punën për zbardhjen e plotë të rrethanave të konfliktit.
