Shtetet e Bashkuara po zgjerojnë përdorimin e një sistemi të lirë dhe efektiv kundër dronëve, i cili është testuar në luftën në Ukrainë, duke e shpërndarë te aleatët e tyre në Lindjen e Mesme.
Sipas The Defense Post, Departamenti Amerikan i Shtetit ka miratuar shitjen e sistemit Advanced Precision Kill Weapon System (APKWS) për Izraelin, Katarin dhe Emiratet e Bashkuara Arabe.
Ky sistem shndërron raketat e zakonshme në municione të drejtuara me precizion dhe është përdorur gjerësisht për të neutralizuar dronë të tipit Shahed, të lidhur me Iranin.
Interesi për APKWS është rritur ndjeshëm pas përdorimit në Ukrainë, ku është provuar si një alternativë shumë më e lirë krahasuar me raketat tradicionale ajër-ajër.
Çmimi i çdo rakete vlerësohet rreth 30-31 mijë dollarë, shumë më i ulët se sistemet klasike, duke e bërë atë të përshtatshëm për përballimin e sulmeve masive me dronë.
Paketa për Izraelin dhe Katarin përfshin secila rreth 10 mijë njësi, me një vlerë afro 1 miliard dollarë, ndërsa Emiratet kanë kërkuar 1 mijë e 500 sisteme të përshtatura për përdorim ajër-ajër.
Sistemi është integruar edhe në avionë luftarakë si F-16 Fighting Falcon, duke rritur ndjeshëm kapacitetin për të goditur një numër të madh objektivash në një mision të vetëm.
Sipas zyrtarëve amerikanë, këto marrëveshje synojnë forcimin e mbrojtjes së aleatëve dhe përballimin e kërcënimeve në rritje nga dronët, ndërsa gjithashtu rrisin ndërveprimin me forcat amerikane.
Vendimi për shitjen është miratuar me procedurë të përshpejtuar për arsye sigurie kombëtare, duke shmangur shqyrtimin standard në Kongres.
