Teksa ministrja e Ekonomisë dhe Informacionit, Delina Ibrahimaj, raportonte këtë të premte vendimet e marra në mbledhjen e Këshillit të Ministrave, përpara Kryeministrisë vijonte protesta e qytetarëve që kërkonin dorëheqjen e qeverisë dhe të kryeministrit Edi Rama.
Gjatë konferencës për mediat, protestuesit dëgjoheshin duke thirrur me altoparlant slogane kundër qeverisë. Ndërsa komentoi protestën që zhvillohej paralelisht me konferencën e saj, Ibrahimaj tha se numri i protestuesve është më i vogël se mbështetja që Partia Socialiste ka marrë në zgjedhjet parlamentare të vitit 2025.
“Shoh që janë një numër qytetarësh që po thërrasin me zë të lartë teksa unë jam duke folur, por janë 850 mijë qytetarë që kanë zgjedhur Partinë Socialiste dhe Edi Ramën për drejtimin e vendit”, u shpreh ajo.
E pyetur nga gazetarët për protestat e zhvilluara në Tiranë përgjatë 26 ditëve të fundit, Ibrahimaj zgjodhi t’i përgjigjej duke vënë theksin te puna e qeverisë dhe mbështetja elektorale që, sipas saj, gëzon Partia Socialiste.
