SPAK ka ushtruar kontrolle ndaj disa punonjësve të Hipotekës së Vlorës, në kuadër të hetimeve që lidhen me çështjen e tokave në zonën e Zvërnecit.
Burime bëjnë me dije se në fokus të veprimeve hetimore janë disa zyrtarë të këtij institucioni, mes tyre Rembrand Dine, Vanessa Bylo dhe Ergyst Skenderi.
Kontrollet dyshohet se lidhen me procedurat e administrimit, trajtimit dhe regjistrimit të pronave në zonën e Zvërnecit.
Prej disa kohësh, SPAK ka nisur hetime mbi mënyrën e përfitimit të tokave në këtë zonë, ku dyshohet për një skemë të përfshirjes së individëve dhe kompanive të ndryshme.
Në fokus të hetimeve janë edhe procedurat që lidhen me projektet turistike të planifikuara në Zvërnec, zonë që është përmendur për investime të mëdha në turizëm.
Një prej projekteve të promovuara publikisht është lidhur edhe me emrin e Jared Kushner, dhëndrit të presidentit amerikan Donald Trump.
Deri më tani, SPAK nuk ka dalë me një njoftim zyrtar për kontrollet e kryera dhe nuk janë bërë publike detaje mbi veprat penale për të cilat po hetohet.
Hetimet pritet të sqarojnë rolin e zyrtarëve të Hipotekës së Vlorës në procedurat e pronave në Zvërnec dhe nëse ka pasur shkelje gjatë regjistrimit apo administrimit të tyre.
