Elvis Kosova është arrestuar në flagrancë në Palasë, pasi dyshohet se dhunoi dhe kërcënoi bashkëshorten e tij gjatë një konflikti familjar. Policia i sekuestroi një armë zjarri tip pistoletë, tre krehra dhe municion luftarak.
Ngjarja u raportua rreth orës 13:40 të së dielës, në një vilë brenda një kompleksi turistik. Patrulla e zonës konstatoi një situatë të përshkallëzuar, ndërsa për neutralizimin e saj u angazhuan edhe forca shtesë të Stacionit të Policisë Dhërmi.
Gjatë ndërhyrjes në vilë, efektivët gjetën një pistoletë. Kontrollet vijuan edhe në banesën e 40-vjeçarit në Tiranë, ku u sekuestruan dy pako me municion luftarak dhe dy krehra me fishekë.
Sipas Policisë, ndërhyrja e shpejtë shmangu përshkallëzimin e konfliktit dhe një ngjarje potencialisht të rëndë kriminale. Kosova u shoqërua nga Forca Kombëtare e Sigurisë, Njësia Fier, ndërsa vijojnë veprimet për dokumentimin e plotë të rastit.
VNA raporton se Elvis Kosova është një emër i njohur për autoritetet. Një vit më parë, në garazhin e tij ishte vendosur lëndë eksplozive, ndërsa rreth dy vite më parë u arrestua së bashku me një shtetas turk, nën dyshimin se tentuan të përvetësonin përmes mashtrimit një automjet “Audi” me vlerë rreth 200 mijë euro.
Ai është përfolur gjithashtu për organizimin e garave të paligjshme me automjete.
