Tyler Robinson, 23-vjeçari i akuzuar për vrasjen e aktivistit konservator amerikan Charlie Kirk, nuk i ka pranuar akuzat ndaj tij dhe është deklaruar “i pafajshëm” para gjykatës.
Gjykatësi Tony Graf vendosi se prokuroria ka paraqitur prova të mjaftueshme që Robinson të gjykohet për të shtatë akuzat, mes tyre edhe atë për vrasje të rënduar. Kjo akuzë mund të sjellë dënimin me vdekje nëse ai shpallet fajtor.
Robinson akuzohet se më 10 shtator 2025 qëlloi Charlie Kirk gjatë një aktiviteti në Utah Valley University. Sipas prokurorisë, ai qëlloi nga një çati, nga një distancë prej më shumë se 120 metrash, ndërsa në aktivitet ndodheshin mbi 3,000 persona. Kirk u godit nga një plumb dhe humbi jetën.
Prokurorët pretendojnë se kanë prova që e lidhin Robinson me krimin, përfshirë ADN-në e gjetur në armën e dyshuar të vrasjes, si dhe një shënim të shkruar me dorë dhe mesazhe që, sipas tyre, tregojnë motivin e sulmit. Mbrojtja ka vënë në dyshim besueshmërinë e disa prej analizave të ADN-së dhe ka kundërshtuar pretendimin se të tjerë në turmë ishin vënë në rrezik të drejtpërdrejtë.
Pikërisht rreziku ndaj personave të tjerë është një element i rëndësishëm, pasi prokuroria argumenton se të shtënat drejt një aktiviteti me mijëra pjesëmarrës e bëjnë çështjen të përshtatshme për akuzën që lejon kërkimin e dënimit kapital. Gjykatësi pranoi që prokurorët mund të vazhdojnë të kërkojnë dënimin me vdekje.
Në sallën e gjyqit ndodheshin edhe prindërit e Charlie Kirk dhe bashkëshortja e tij, Erika Kirk. Çështja tashmë do të kalojë në fazën e gjykimit.
