Alket Rizai, një nga emrat më të njohur të kronikës kriminale në Greqi për arratisjet spektakolare nga burgu, është shpallur sërish në kërkim nga autoritetet greke, pasi nuk u kthye në burgun e Domokos pas përfundimit të lejes së tij të ligjshme.
Sipas mediave greke, Rizai kishte dalë me leje më 7 shtator dhe duhej të paraqitej sërish në burg mëngjesin e së hënës, në orën 08:30. Por ai nuk u kthye. Drejtori i burgut njoftoi policinë rreth orës 08:45 dhe nga ai moment Rizai konsiderohet zyrtarisht i arratisur. Mediat greke saktësojnë se nuk bëhej fjalë për “16 ditë leje”, por për lejen e 16-të që ai kishte marrë që nga viti 2021. Lejet e mëparshme, sipas raportimeve, kishin kaluar pa probleme.
Rizai ndodhet në qendër të hetimeve edhe për një përplasje me armë të ndodhur në orët e para të së dielës jashtë një beach bar-i në Anavyssos, në juglindje të Athinës. Sipas hetimeve paraprake, tensioni nisi pas mbylljes së muzikës në lokal, ndërsa grupi ku ndodhej Rizai dyshohet se qëndroi jashtë ambientit dhe vendosi muzikë me volum të lartë nga një automjet.
Debati me punonjësit dhe personelin e sigurisë u përshkallëzua më pas në përdorim arme. Nga të shtënat mbetën të plagosur lehtë dy persona: një 41-vjeçar pakistanez, i cili mori plagë tejshpuese në shpatull, dhe një 20-vjeçar grek, i lënduar nga xhamat e thyer. Në vendngjarje policia gjeti gëzhoja dhe njolla gjaku.
Sipas burimeve të cituara nga mediat greke, pamjet e kamerave të sigurisë dyshohet se tregojnë Rizain të armatosur dhe duke qëlluar në ajër. Autoritetet kanë arrestuar pronarin 41-vjeçar të lokalit, i dyshuar për fshehje të autorit dhe pengim të hetimeve, si dhe bashkëshorten e tij 39-vjeçare, e dyshuar për dëshmi të rreme. Policia greke po kërkon gjithashtu edhe një tjetër person, me origjinë afgane, i cili punonte si pjesë e sigurisë së lokalit dhe dyshohet të ketë rol në të shtënat.
Emri i Alket Rizait është i lidhur prej vitesh me disa nga arratisjet më të bujshme nga burgjet greke. Ai u bë i njohur në vitin 2006, kur u arratis nga burgu i Koridallos me helikopter së bashku me Vasilis Paleokostas. E njëjta skenë u përsërit në vitin 2009, duke tronditur sistemin grek të burgjeve dhe duke e kthyer Rizain në një nga figurat më të përfolura të kronikës kriminale.
Rizai është dënuar me burgim të përjetshëm për vrasje të rënda, ndërsa në vitin 2013 u përfshi edhe në një tentativë tjetër arratisjeje nga burgu i Malandrinos, ku u morën peng punonjës të burgut.
Pavarësisht këtij profili të rëndë kriminal, mediat greke raportojnë se ai kishte përfituar leje të rregullta nga burgu gjatë viteve të fundit, pasi, sipas burimeve policore dhe juridike, kishte plotësuar kushtet ligjore për leje dhe ishte në fazën kur mund të kërkonte edhe lirim me kusht. Pikërisht për këtë arsye, disa burime të policisë greke vlerësojnë se ai mund të paraqitet vetë në burgun e Domokos.
Deri tani, megjithatë, Rizai mbetet në kërkim. Ngjarja ka hapur sërish debatin në Greqi për mënyrën se si një i dënuar me histori arratisjesh, i lidhur me vrasje dhe episode të rënda kriminale, mund të lëvizte jashtë burgut me leje të rregullt, derisa leja e 16-të u kthye në një tjetër dosje policore.
