Ambasadorja e Shteteve të Bashkuara në Greqi, Kimberly Guilfoyle, është vënë sërish në qendër të vëmendjes pas një investigimi të The Wall Street Journal, sipas të cilit ajo është mburrur për lidhjet e ngushta me dy biznesmenë të pasur grekë, të cilët dyshohet se i kanë financuar udhëtimet me avionë privatë dhe qëndrimet në hotele luksoze.
Sipas gazetës amerikane, e cila citon persona që kanë dëgjuar bisedën dhe një regjistrim audio të siguruar prej saj, Guilfoyle foli për këto lidhje në Forumin Ekonomik Botëror në Davos, në janar të vitit 2026. Në atë kohë, ajo po përpiqej të siguronte një ftesë për një darkë të organizuar për Eric Trump, djalin e presidentit amerikan Donald Trump, pasi emri i saj nuk ishte përfshirë në listën e të ftuarve.
“E di, mund të ta sjell botën në duar. Gjë që e meriton”, dëgjohet të thotë Guilfoyle në regjistrim. Në një moment tjetër të bisedës me një biznesmen amerikan, ajo shprehet: “Do të të bëj të fitosh shumë para”.
Ambasadorja reagoi me zemërim për mungesën e ftesës, duke thënë se organizatorja e aktivitetit duhej ta kishte trajtuar me më shumë respekt. Në fund, Guilfoyle arriti të siguronte një vend në darkë në momentin e fundit. Kryetarja e organizatës Greek House Davos, Irene Vantaraki, deklaroi se ekipi i saj ishte detyruar të menaxhonte një situatë të vështirë që kishte përfshirë disa të ftuar të rëndësishëm. Sipas saj, Guilfoyle u tregua e sjellshme dhe diskrete dhe u largua herët nga aktiviteti.
Në regjistrimin e publikuar nga The Wall Street Journal, Guilfoyle pranon se kishte udhëtuar drejt Davosit me avionin privat të Alexandros Exarchou, drejtuesit ekzekutiv të kompanisë greke të ndërtimit Aktor Group.
Gazeta ka raportuar më herët se Guilfoyle u kishte nxitur qeverive, përfshirë ato të Shqipërisë dhe Bullgarisë, të bashkëpunonin me Exarchou dhe të blinin gaz natyror amerikan me vlerë miliarda dollarë përmes kompanisë së tij. Në regjistrim, ajo e përshkruan biznesmenin si pjesë të rrethit të saj të afërt.
Një tjetër biznesmen që, sipas raportimit, ka lehtësuar udhëtimet e ambasadores është manjati grek i transportit detar Nikolas Tsakos. Guilfoyle tha se planifikonte të udhëtonte me avionin e tij drejt Parisit për të marrë pjesë në sfilatën e modës së bashkëshortes së tij. Ajo përmendi gjithashtu se kishte kaluar një pjesë të festave të fundvitit me çiftin në vendpushimin luksoz të Gstaadit, në Zvicër.
Sipas personave të cituar nga gazeta, Tsakos kishte mbuluar edhe faturën e qëndrimit të Guilfoyle në hotelin luksoz Four Seasons George V në Paris. Ambasadorja publikoi më pas në Instagram rreth 20 fotografi nga aktiviteti i modës, ku shfaqej me disa fustane të stilistëve të njohur, përfshirë edhe fotografi me Tsakos.
Tsakos dhe bashkëshortja e tij nuk iu përgjigjën kërkesave të gazetës për koment, ndërsa Aktor Group, përmes avokatëve, refuzoi të komentonte. Përfaqësuesit ligjorë të kompanisë kanë mohuar se Guilfoyle ka promovuar në mënyrë të papërshtatshme interesat e saj tregtare.
Një zëdhënës i Ambasadës së SHBA-së në Athinë deklaroi se Guilfoyle ka respektuar udhëzimet e Departamentit të Shtetit për etikën dhe deklarimin e dhuratave. Ai i cilësoi pretendimet si të pambështetura dhe si një përpjekje për të larguar vëmendjen nga puna e ambasadores në Greqi dhe në Mesdheun Lindor.
Zbulimet e reja vijnë në një kohë kur Departamenti i Shtetit po heton nëse Guilfoyle ka përfituar dhurata ose favore nga biznesmenë privatë. Sipas The Wall Street Journal, zyrtarë të administratës Trump po diskutojnë mundësinë e largimit të saj nga posti, ndërsa një vendim pritet të merret nga presidenti amerikan.
Ambasadorja ishte përballur më herët me akuza të tjera pas publikimit të mesazheve që pretendohet se i kishte dërguar një donatori të Donald Trumpit, duke i kërkuar 100 mijë dollarë për të shlyer detyrimet e kartës së saj American Express. Sipas raportimit të gazetës, në këmbim ajo kishte ofruar ndihmë për të tërhequr vëmendjen e administratës amerikane ndaj çështjeve personale ligjore dhe tatimore të donatorit. Avokati i Guilfoyle ka kundërshtuar autenticitetin e mesazheve.
Zhvillimet kanë nxitur reagime nga demokratët në Kongresin amerikan. Gregory Meeks, anëtari kryesor demokrat në Komisionin për Punët e Jashtme të Dhomës së Përfaqësuesve, kërkoi një hetim të menjëhershëm për të përcaktuar nëse ambasadorja ka shkelur ligjet federale kundër ryshfetit dhe korrupsionit. Edhe Robert Garcia, drejtuesi demokrat i Komisionit për Mbikëqyrjen në Dhomën e Përfaqësuesve, kërkoi dokumente financiare dhe komunikime me zyrtarë të qeverisë amerikane.
Zëvendëspresidenti JD Vance deklaroi se akuzat duhet të shqyrtohen përpara se të nxirren përfundime. “Le të shohim se cila është e vërteta. Dhe, natyrisht, nëse ka ndodhur diçka e gabuar, njerëzit duhet të përballen me pasojat”, u shpreh ai.
