Qeveria premton rritje të pensioneve dhe dyfishim të shtesave në vitet në vijim, por përfitimi nuk do të jetë i njëjtë për të gjithë. Masa mujore do të përcaktohet nga kategoria dhe vlera e pensionit, ndërsa ata që kalojnë kufijtë e vendosur do të mbeten jashtë skemës. Një rritje me disa masa dhe kushte, që e bën premtimin për pensione më të larta të ndryshëm nga ajo që do të përfitojë secili pensionist.
“Ekonomia na e ka dhënë mundësinë, rritja e pensioneve të dyfishohet në çdo vit pasardhës. Rritja e këtij viti do të jetë e dyfishuar, e kam thënë për ata që e bënë madhështore protestën e Flamingos, jam i vetëdijshëm nga rritja e kostos së ushqimeve apo e naftës”, deklaroi kryeministri Edi Rama.
Por nga rritja e pensioneve nuk do të përfitojnë të gjithë. Të moshuarit që marrin pension pleqërie, nënat me shumë fëmijë apo ata që e përfitojnë për shkak të pensionit prej janarit do të marrin nga 1 mijë e 800 lekë shtesë çdo muaj. Por kushti është që pensioni i tyre mos jetë më i lartë se 40 mijë lekë në muaj.
Rritje me 800 lekë në muaj përfitojnë të moshuarit që marrin pensin pleqërie të pjesshëm apo ata që përfitojnë strehim social nën 22 mijë lekë në muaj. Kush merr më shumë se 22 mijë lekë në muaj përjashtohet nga rritja.
Rritje me 1 mijë lekë në muaj do të përfitojnë pensionistët në fshatra, ish-koperativistët të cilët marrin më pak se 18 mijë lekë në muaj. ata që marrin mbi këtë shumë janë të përjashtuar nga rritja mujore.
Të përjashtuar nga rritja janë edhe përfituesit e pensionit familjar që marrin mbi 18 mijë lekë në muaj. Ata që marrin më pak se kjo shumë do të përfitojnë 700 lekë në muaj.
E njëjta vlen edhe për përfituesit e pensionit të invaliditetit që marrin mbi 30 mijë lekë në muaj. Kush merr më pak se kjo shumë përfiton 600 lekë në muaj rritje.
Në total do të marrin bonus mujor 727 mijë pensionistë nga në vend janë gati 770 mijë që janë në total. Vetëm 36 për qind e tyre do të marrin 1800 lekë në muaj, pasi pjesa dërrmuese gati 41 për qind do marrin 800 lekë, ndjekur nga 10.3 për qind që do të marrin 1 mijë lekë, e pjesa tjetër janë në vlerat 600-700 lekë.
