Qindra qytetarët, prefisonistë të lirë dhe jo vetëm, protestuan paqësisht pasditen e kësaj të enjte para godinës së Gjykatës Kushtetuese, të cilët kërkuan shfuqizimin e ligjit për tatimin mbi të ardhurat ndaj profesioneve të lira, e cila sjell eliminimin e shtresës së mesme në Shqipëri.
Sipas ligjit të ri, të vetëpunësuarit e profesioneve të lira nuk do të trajtohem më si biznes i vogël me 0 %, por të ardhurat neto (fitimi) nga biznesi për të vetëpunësuarit po tatohen me normat 15% për fashën 0 deri 14.000.000 lekë dhe mbi 14.000.000 lekë është vendosur tatimfitimi 23%.
Protestuesit mbanin pankarta me mbishkrimet “Dua të taksohem sa oligarkët”, “Dua oksigjen për biznesin tim”, “I duam taksat sa Erion Braçe” apo edhe pankarta me mbishkrimin “I shtrenjti profesion i lirë”.
Pjesë e protestët u bënë edhe disa dele, në mënyrë simbolike, të cilat mbanin të varur pankartën “Kafe po, protestë jo” apo “Plazh po, protestë jo”. Drejtuesi i protestët, aktori Florjan Binaj tha se ato simbolizojnë të gjithë ata profesionistë të lirë që nuk patën guximin të vijnë në protestë.
Protesta ishte organizuar nga emisioni “Piranjat”, teksa i ishin bashkuar edhe të gjitha partitë të opozitës, parlamentare ose jo, të majta apo të djathta, të cilat kishin dërguar përfaqësuesit e tyre për të mbajtur fjalime duke ngritur zërin ndaj këtij shqetësimi.
Vetëm Dhoma Kombëtare e Avokatisë dhe ajo e Noterëve nuk ka dërguar përfaqësuesit e saj në këtë protestë.
“Ne mbështesim profesionet e lira, pasi ju jepni kontribut të jashtëzakonshëm për këtë vend. Keni zgjedhur të jetoni në Shqipëri kur shumë të tjerë janë larguar. Ju përgëzoj për këtë qëndresë e për këtë protestë, meritoni mbështetje”,– tha Tedi Blushi, nga Partia e Lirisë.
Në protest ka mbajtur fjalën e saj edhe përfaqësuesja e “Shqipëria bëhet”, Edlira Çepani.
“Jemi trajtuar pa dinjitet, sepse ajo administratë që përbëhet nga militantët thanë pop se mos ti taksojmë ne këta profesionist, pse mos ta mbajmë ne premtimin që thoshte se askush nuk do të tatohej deri në 2029, pse të mos sulmojmë shtresën e mesme. Kështu ndodh në Shqipëri, sulmohen ata që mund të ngrenë zërin”,-tha ajo.
“Ku shkojnë këto para? Kemi 11 koncesione prej 14.3 miliardë lekë që do u paguajmë inceneratorëve, koncensioneve për sterilizimin, kemi këta investitorët strategjik që jo vetëm nuk paguajnë tatime, por i financon shteti për të zaptuar bregdetin dhe për të pastruar paratë e drogës. Kemi edhe profesionistë të lirë, është ai grup njerëzish që sjell metodat, teknologjinë më të fundit dhe këta tatohen. Pse ndodh kjo? Po afron fushata elektorale dhe mendojnë se s’do kenë më mundësinë për të bërë kërdinë? Kjo është një fuqi intelektuale që po detyrohet të largohet jashtë vendit”,-tha Redi Muçi nga Lëvizja Bashkë.
I pranishëm në protestën e sotme ka qenë dhe anëtari i Kryesisë së PD-së, Belind Këlliçi. Gjatë fjalës së tij, Këlliçi u ndal tek një pankartë e një protestuesi ku shkruhej “Taksat i duam sa Erion Braçe”, nisur nga reagimi i djeshëm i deputetit socialist në Kuvend, ku tha se profesionistët e lirë le të ikin, jo vetëm në Kosovë, po ku të duan, pas tatimit mbi të ardhurat.
Këlliçi tha se Erion Braçe shprehu mllefin dhe urrejtjen ndaj profesioneve të lira dhe nuk e kishte problem që truri dhe shtresa e mesme e shoqërisë shqiptare edhe të largohej nga vendi si pasojë e kësaj takse.
Ai tha më tej se Qeveria e Ramës kërkon që t’i marrë 30 milion euro shtresës së mesme dhe t’ia japë inceneratorit fantazëm të Tiranës.
Këlliçi: Për herë të parë më bën dhe mua të jem dakord kur shoh vetëm një herë të vetme emrin e Erion Braçes. Ajo pankartë që thotë që ‘taksat i duam sa Erion Braçe’. Duke parë reagimin e një deputeti të mazhorancës ditën e djeshme në Parlament duke parë urrejtjen që kishte për profesionet e lira ku nuk e kishte fare problem që këto të shkonin në Kosovë, më erdhi mirë që ka pasur protestues që e kanë evidentuar këtë retorikë të një ish-zëvendëskryeministri të kësaj qeverie, i cili me mllef dhe urrejtje dje u shpreh kundër profesioneve të lira. E gjitha kjo betejë që behet me trurin me shtresën e mesme të vendit tonë bëhet për të marrë 30 milionë euro në vit dhe për t’i çuar te inceneratori i Tiranës, fantazëm që nuk ekziston.
Nga 1 janari 2024, kur ligji i ri nisi zbatimin me profesionet e lira, është paditur 4 herë në Gjykatën Kushtetuese. Seanca e parë për shqyrtimin e padive do të mbahet më 18 Qershor.
Deri më tani, anëtarët e Gjykatës Kushtetuese “të reformuar të drejtësisë së re”, kanl treguar se janë “ushtarë” të bindur të kryeministrit Edi Rama, duke marrë çdo vendim në favor të tij. Ky i fundit ka ndërmarrë një nismë ligjore, duke i shpërblyer me rritje “galopante” të pagave, por ende nuk po gjen votat e mjaftueshme në Kuvend, pasi për miratimin e atij ligji duhen 84 vota, kështu që duhet të bindë dhe një pjesë të opozitës.
