Zini Murati, 60 vjeç ka humbur tragjikisht jetën mesditën e kësaj të dielë në minierën e Bulqizës, teksa ishte në punë. Policia bën me dije se ai ka mbërritur pa shenja jete në spital. Ndërkohë raportohet se ka nisur një hetim në lidhje me zbardhjen e rrethanave të ngjarjes. Dyshohet se shkak është bërë rrëshqitja e një masivi gurësh. Ndërsa bëhet me dije se janë shoqëruar në polici personat përgjegjës për mbarëvajtjen e punës.
NJOFTIMI I POLICISË:
Bulqizë/informacion paraprak. Rreth orës 11.30, është dërguar në spital pa shenja jete, shtetasi Z.M., rreth 60 vjeç, i cili dyshohet se është aksidentuar gjatë punës në një subjekt minerar, në Bulqizë. Policia po shoqëron personat përgjegjës, ndërkoh grupi hetimor po punon për zbardhjen e rrethanave dhe dokumentimin e ngjarjes.
Po ditën e sotme, Servet Ziflaj mbeti i plagosur rëndë në Sarandë pasi ra nga lartësia në objektin ku po punote. Ai u transportua menjëherë në spitalin e Truamës me helikopter dhe ndodhet gjendje të rëndë shëndetësore. Vetëm në gjashtë mujorin e parë të vitit 2024, 15 punonjës kanë humbur jetën në vendin e punës.
