Organizata Ndërkombëtare e Policisë Kriminale (Interpol) ka arrestuar shqiptarin Armando Pacani, i cili po hetohej në Brazil për drejtimin e një organizate kriminale braziliane që dërgonte kokainë në Evropë.
Pacani ishte në listën e kuqe të Interpolit dhe u arrestua në datën 29 në Dubai, në Emiratet e Bashkuara Arabe. Brazili ka 30 ditë për të dërguar kërkesën zyrtare për ekstradimin e tij.
Sipas një shkrese nga Ministria Federale Publike, Pacani ishte marrësi i një pjese të madhe të 17 tonëve kokainë të pastër që grupi kriminal me bazë në portet në jug të vendit dërgonte në Evropë për një periudhë dyvjeçare, me vlerë në 3.8 miliardë dollarë.
Sipas MPF, grupi dërgoi të paktën 13 ngarkesa kokaine nga vendet e Andeve, nga portet e Rio Grande, në Rio Grande do Sul dhe Itajaí, në Santa Catarina. Droga fshihej në kontejnerë me ngarkesë të ligjshme, pa dijeninë e pronarëve të mallit, ose lihej në anije peshkimi.
Një nga dërgesat u sekuestrua nga marina franceze pranë Sierra Leones në nëntor 2022. Varka e peshkimit mbante 4.6 ton kokainë në rreth njëqind valixhe. Operacioni ishte një aksion i përbashkët midis DEA-s amerikane, Agjencisë së Bashkimit Evropian për Bashkëpunim Policor (Europol) dhe autoriteteve franceze.
Nga hetimet rezulton se një shtetas paraguaian furnizonte ngarkesa me kokainë të blerë në Bolivi për pronarët e kompanive të logjistikës detare në Brazilin jugor, të cilët i dërgonin në Evropë. Droga hynte përmes kufirit me Paraguajin, në rajonin e Pedro Juan Caballero dhe Ponta Porã, kalonte disa shtete me kamion, deri sa të arrinte në jug, nga atje u dërgohej blerësve evropianë.
Pacani ishte emëruar si përgjegjës për monitorimin e “logjistikës së trafikut ndërkombëtar të drogës, nga furnizimi në vendet e Andeve, përmes magazinimit dhe punës në port, transportit detar, deri në marrjen në Evropë”. Ai kishte qenë në arrati që kur Policia Federale nisi Operacionin Hinterland në mars të vitit të kaluar. I njohur me emrat e koduar Albanês, Forbes dhe Globe, Pacani akuzohet për krimet e trafikut të drogës, pastrimit të parave dhe organizimit kriminal.
